Malaysia, Kuala Lumpur khawpi laiah Rakhine mi U Saw Aung ih a neimi Myanmar Uyin hmin thawi awnmi Dawr cu friday zanlam nazi 5 hrawngah misualpawl in an ra siatsuah ti thu theih asi.
         Hi misual pungkhawm mi 50 hrawng cu Myanmar Uyin dawr hnuaiih ummi eiin zuarnak thlalang pawl an vawkuai ih cuti dawr sungih ra lut an si ih dawr sungih ummi thilri hmuahhmuah zikte in an vawkuai darh theh tin Myanmar Uyin ih dawrih hnatuantu pawl hotu Daw Khin Khin San Aye in FRA(Myanmar) hnenah a sim.
         "Thlalang pawl an vaw kuai ih cutin an ra lut, a sungah computer counter khal a um.Cun air ticket zuarnak counter khal a um,thilri zuarnak counter tete pawl khal an um, cu pawl hmuahhmuah an vaw se theh. Computer khal an vawkuai theh ih a um mi thilri zate ih hrek aitam sawn cu an vaw siat theh. A sunghman luh a ngah lo.Hnatuantu pawl len an mah tih ah inn parah an rek relh theh ve." Daw Khin Khin San Aye ih sim mi a si.
          Hiti sualnak tuahtu pawlin Rohingya ti catluan ngan tarmi T-shirt an hruak ciar tin a sim bet. An mah pawl hi Kuala Lumpur ih Myanmar Ambassy office hmaiah an lungawi lonak ti langih zin an zawh an tlunlam ah himi dawr hi an va suasam a si ding tin zumnak a um.
          Himi pawl lakih mi 8 cu Malaysia palik in an kaingah ih a tulmi hliakhlai suhhliahawknak pawl an tuah rero lai a si ti thu theih a si.

HTML Comment Box is loading comments...