Aug 4, Nitin Van Mana
Saam 66-67, Rom 7


Saam 66:12
Kan ral pawlih palcihmi ah in tuah ih meisa le tilian lakin kan feh. Asinan a tu cu himnak hmunah in thenpi zo.


Sui le ngun cu somei ih hniksak asi bangin Pathian khalin a falepawl in hniksak (Saam 66:10). Kan zumnak a fek sinsinnak dingah le kan nun a cak sinsinnak dingah Pathian hnenih rintlak kan sinak langter dingin hniksak kan si ttheu. Harsatnak le buaibainak pawl tla cu kan nunnak ah thengin kan ralkhat lamah in dodaltu an suak ttheu. Hniksaknak a tuarlomi zumtu kan umlo. A te le tum in kan sinak zawn cio ah hniksaknak a tong ringringtu kan si. Asinan Pathian in a falepawl a dungtun lanta dahlo. Ziangvek hniksaknak a thlen khalah an hrangah humhimnak a tuah sak.


“Pathian ih tikcu a thlen tiang tlulote ih a ding hngettu cu Pathian ih humhimnak le runnak tlamtling an hmu ding, van thlawsuah le lei thlawsuah phunkim thawn.”




Rom 7:24-25
Thin nuamlo minung ka va si so? Thihnak lamih i-khortu hi taksa pum ihsin zoso i-runsuak ding? Pathian hnenah thangtthatnak um ko seh. Pathian amah in kan Bawipa Jesuh Khrih thawngin i-runsuak asi.


Tisa duhhiarnak le thlarau lam an sualaw ttheu. Kan tuah duhlomi sualnak kan tuah tikah kan thin a nuamlo ttheu mi khi Pathian fate kan si ruangah asi. Satan fa, misualpawl cun thinnuam takin sualnak an tuah thei. Ziangahtile an sinak ah misual an siih an tuah dingmi cu sualnak hrimhrim asi.


Kannih zumtupawl cu lei tisa in kan um hrih ih sualnakin in hnaihnok thei ttheu hman sehla cui' sualnak sungah kan nuam thei nawnlo. Cule cumicun kanmahte kan luat theiloih Khrih thawngin miluat kan sizia zumnak in pek. Cuti'n Pathian thangtthatnak nun kan nei dingih kan nunnak ah Pathian hmin a sunglawi sin ding hi asi.


“Sualnak na tuah ttheu ruangih na thin a nuamlomi kha Pathian fate na si ruangah hokhaw. Khrih thawngin miluat na si zo ruangah sualnak kha Khrih thawngin neh vivo aw.”






Pathian thlawsuahnak ….. na hnen um hram seh!!!

HTML Comment Box is loading comments...