Na duh lo mi lo nei ter(coter) seh la ziang tin na um ding? Na lungawi in ka khir ciamco pei maw? Thin nuam leh aipuang in na um pei maw? Mai duh mi si lo ih mai co mi ih lungawi ringring hi thil awl lo leh duhum tuk lo thil pakhat a si ve. Sinan milai kan si sungah hin cun kan duh mi kan ngah ring ring lo ding ih kan duh lemlo mi sawn khal kan ngah phah ringring fawn theu si.
            Ziang kan tuah tuan nak khal ah kan tuah mipar ah a tha bik in kan tuah ngah kan ti caan khal ah hlawhtlin nak kan ngah theh lo ih cu ai hnak hman in kan rin lo mi sawn sunnak tla kan ngah cang a tam theu. Kan thil tuah mi kan tuah ngah ngai ngai lo teh a si pei maw? Cu lo len kan ralring tawk lo teh a si thei pei maw? Sinan, kan tuah theh lai ah cun a dik, a tawk kan ti theu ko ding. Kan mai ruah nak lawng ih tha pi tling lawng a rak si sawn men thei. Kan tuah mi hi theifiang in ngam zet in tuah seh la teh kan hlawhtling deuh pei maw?
          Sumdawng tam pi khal an dawn pek ah a hlawhtling tla tam pi an um vek in hlawh tling lo khal tam pi an um ve lala. Vei tam an hlawh tlin hnu khal ah hlawhtlin lo caan an nei ve thotho. An hlawhtlin lo rero hnu khal ah hlawh tlin nak an tawng theu lala. Leitlun a hlum ih a her aw rero ih curuangah hlawh tlin caan leh hlawh tlin lo caan khal a her aw ve rero ti capoh ih an rak ti theu mi tla thu ngai a bang zik te lam. Hlawh tlin hi kan zate ih kan duh mi a si nan hlawh tlin ringring cu a theih lo ding ih sun ringring khal a theih cuang lo. Sumdawng tam pi cu an thil ri dawr hlan ah an lak ding mi thil ri rak luck zet hman seh la an hun dawr aw theh ih an hun pek suak zawng ih a lei tu ding in an rak duh nawn lo cun sun lawng a tang thlang si ko. An lak lai ih luck zet an pek suah zawng khal ih mi duh zet lai mi a si ah cun hlawhtlin nak cu a si ve ta mai.
              Bazaar ih aanhnah aanrah zuar tu khal in sung leh hlawk an nei ve thotho. Khawng that ni cu hlawk ni a si mai ih khawng theilo ni cu sunni a si ta mai. An duh maw duh lo maw ti lam si lo in a lei tu ih an lei leh lei lo, an khawng tam leh khawng tam lo ih zir in an sung tam ding maw an hlawk tam ding ti a si ta ko. Khawng tam ih miat tam pi ngah ding cu thil zuar tu zate ih duhthu sam a si ta miau. Sinan khawng ring ring a thei loh ih sun cang miat cang cu bang aw lo zet ih an tawn ding mi thil pakhat a si.
                 Company nei tu pawl khal sung ti mi an tawn lo nak ding in zuam thei tawk in an zuam theu na cing in an neih mi company tiang zuar sal tiang a tuar tu mi tam an um thotho. A company ih tuantu pawl in ziang ti vek khla in zuam rero khal seh la an thang so thei ring ring lo ih an sun cang cu a um thei thotho. Zuam rero si ih hlawh tlin nak ngah cuang lo khal a cang thei mi thil pa khat a si. A sung ih hngatuan tu pawl ih hlawh man pe thei lo hman tam pi an um ko.
              Kan hlawhtlin thei nak ding ah ziang ha kan tuah len a tha bik ding? ti thu suh nak hi cu a phi pek ding a um ding nan a har zet ding. Curuangah, kan tuah ding mi ah kan theih fiang ih kan thiam nal zet a tha bik ding a zum um. A cipciar in thei, thiam theh sehla teh hlawhtlin nak kan ngah awl deuh pei maw? Kan tuah ngai ngai tik ah thiam mi hmuah hmuah, theih nak hmuah hmuah, thazang hmuah hmuah kan neih mi in teh tuan seh la a tha deuh pei maw? Mi thik nak nei tuk lo seh la cu ai ah kan hnak ih thiam mi pawl ih hnatuan daan leh an ti daan hi zingzawi in zir seh la teh a tha sawn pei maw? Mah le mah tha bik in ret aw lo in mi aan ngai thiam seh la teh a fuh sawn pei maw?
              Hlawh tlin nak kan tawn ah kan lung a awi thei tuk nan, riahsiat nak lole sunnak kan tawn caan ah kan tuar thiam lo hi kan mah kan tuah mi rah kan ei kan ti thei ve ko ding lo maw? Sunnak kan deuh lo nan kan hlawh tlin lo caan ah tuar daan thiam thei seh la kan mah hrang sunnah lak ih hlawk nak pakhat te kan ngah thei mi thi a si. A har, a awl lo nan kan riahsiat caan ah kan sunnak hram pi theih fiang  tum in hawl sal thiam seh la than so nak in pe thei ding tla a zum um. Hlawk nakkan tawn tik khal ah cu mi kil him ring ring daan ding kan thiam khal a tul tuk ding..



Lungawi...
Salai H.Lun..

HTML Comment Box is loading comments...