July 7, Nitin Van Mana
Job 34-35, Dungthluntu 15:1-21

Job 34:21-22
Pathian in minung lamzin a zoh, milai ih ke kar cu a zohhliah! Ziangvek thimnak a si khal le misual hmu lo dingin Pathian a phen theitu thimnak a um lo.

"Zo hmanin in hmu lo pam, ... Zo hman an um lo pam, ..." ti'n kan duhduh ih kan nun caan a tampi ko ding. Keimah le keimah khal himi Bible bung-cang in theihterawknak ka nei nasa. Pathian cun in hmu ringring, kawmkerih kan tuahmi khal a thei. Pathian hmaikaa ah cun pheh theimi le thuh theimi zianghman kan neilo.

"Pathian cun kan awsuak in siseh kan thinlungte in siseh kan thangtthatnak a thei, kan phunzainak khal a thei thluh."


Dung 15:9
Pathian in anmah le kanmah karlakah thleidannak zianghman a nei lo; an zum ruangah an sualnak khal a ngaidam a si.

Judah pawlin Zentel mi le Judah tiin phun le hnamah an rak buai. Jesuh ih rundamnak thu khalah a co ding le co lo ding ti tiangin an rak buaipi ciamco. Jesuh in leilung pumpuluk, miphun zakip hrangah rundamnak a pek timi an rak cohlang theilo. Peter le pawlin nasazetin an rak simfiang rero; "A zumtu hmuahhmuah in..." ti asi!

Tuisan khalah Judah mi kan silonan Chin mi kan sinak in Pathian thu le rundamnak thuhla ah miphun dang thleidannak thinlung kan nei phah ttheu. Kan miphun kan duhdawt ih kan humhimnak asi kan ti. Pathian ih miphun riangri kan hua ih kan hnong. Pathian in a pekmi rundamnak cu kannih in hruangri kan rak dan theinak a um lo; a zumtu hmuahhmuah hrangah asi.

"Na kiangkap ih Kawl le Vai pawl khal an zum ah cun Vanram an thleng ve ding hokhaw."



Pathian thlawsuahnak ..... na hnen um hram seh!!!

HTML Comment Box is loading comments...