July 8, Nitin Van Mana
Job 36-37, Dungthluntu 15:22-41


Job 36:13
Pathian thei lo pawl cu an thin a ṭeu ringring; Harsatnak an ton hmanah bomnak dilin thla an cam lo.

Pathian na thei maw?
Harsatnak na ton tikah ziang na tuah hmaisabik?

Pathian theilo pawl cu;-
-Harsatnak an ton tikah an thin a tteu, an lung a phang, ziangti'n ka tuah ding, ... tipawl an ruatih mangbangin vansang an lam.
Pathian theitu pawl cu;-
-Harsatnak an ton tikah Pathian hnenah bomnak dilin thla an cam, Bawipa hnenah tuar theinak thazang an dil, Pathian in sim a duhmi le theihter a duhmi an hawl.


Dung 15:39
Cuih thu-ah cun Paul le Barnabas cu napi'n an el aw ih an ṭhen aw. Barnabas in Marka cu a hruai ih Saipras ah long in an feh.

Paul le Barnabas, kutkai aw ih hnattuan tlang rero kha, thuhla pakhat ruangah an lung an hmu aw loih napi'n thu an elaw. Cuti'n anmah le an lamzin ah feh dingin an tthenaw. Paul in Silas a hruai ih Barnabas in Marka a hruai. Marka cu "Marka Thuthangttha" cabu ngantu ah a cang.

Pathian hna kan ttuannak ah kan kutkaihpi kan rualpi thawn awkam elawk caan le thinlung hmuh awk lo caang a um ttheu ko ding. Asinan Khrih ah kan tumtahmi a bangaw fingfing ruangah khat le khat relsiatawk ding le huatawknak ding zianghman a um lo. Pathian in tuahter in duhmi cio, ttuanvo in pekmi cio le in hman duhdaan cio kan bangaw thluh lo pi. Barnabas in Marka rak kaihruai lo bangta sehla "Marka Thungttha" cabu kan Bible sungah siar ding kan neilo men thei.

"Awkam kan elawk ttheu caang le kan ruahdaan a bangawk lo caan khalah Khrih ih hnattuan tlang kan si ringring. Kan ttuanvo cio kan neh ding a thupibik!"



Pathian thlawsuahnak ..... na hnen um hram seh!!!

HTML Comment Box is loading comments...