July 9, Nitin Van Mana
Job 38-40, Dungthluntu 16:1-21


Job 40:1-5

Bawipa in Job hnenah: Job, Ziangkimtithei Pathian cu na engtai a si, Dung na siip ding maw, a thu na let ding so?

Job in hiti in a sawn: Aat thlakza in ka ṭong zo, Bawipa, kei in ziangso ka lo leh thei ding? Zianghman ka ṭong nawn lo ding. Ka ṭong dingzat hnakih tam ka ṭong zo.

Bawipa in Job hnenih a ttong tikah Job cu ttong ngam nawnlote'n a ngui khiokhi.
Vei tampi cu kan thinlung sungih ummi kan ruahdaan le kan si duhdaan lawnglawng kha Pathian hnenah thlacam in kan simih kan dil ciamco ttheu. Pathian hnenin a aw hmuah ngai kan tum lo ttheu. Cutikah Pathian ih thinlung le a ruahnak kan thei dahlo ih tuahter in duhmi tuah ngah loin kan lamzin kan sual ttheu.

"Na duhnak lawnglawng Pathian hnenah thlacam ringring loin Pathian ih thinlung le tuahter a lo duhmi thei dingin na caan pek awla a 'aw' ngai khiokhi ttheu aw."


Dung 16:5
Curuangah Kawhhran pawl cu zumnak lamah an cak deuhdeuh ih ni khat hnu ni khati‘n minung an tam sinsin.

Kawhhran mipipawl zumnak lamah an cak asile zumtu khal an karh sinsin.
Ramthim kan nornak ah, Pathian ram karhzai sin seh kan tinak ah, mission hna kan ttuannak ah, ...
Kan kawhhran hrimhrim zumnak ah a cakmi kan si a ttul.
Bawhlung sitnak ah hmainawrtu pawl lawng cak ciamco in dungkiltu pawl an santlailo asile an sung thotho ding. Dungkiltu pawl an cakih hmainawrtu pawl hrangah bawhlung an pek tthat asile kawl thun rero ih neh asi men.

"Kawhhran mipipawl zumnak ah kan dinghnget, kan cakih kan tthangso asile mission hnattuan nak khal a rak cak sinsin ve."


Pathian thlawsuahnak ..... na hnen um hram seh!!!

HTML Comment Box is loading comments...