July 22, Nitin Van Mana
Saam 31-32, Dungthluntu 23:16-35




Saam 31:22
Ka thin a phang ih ka lung in: ‘A umnak ihsin i hlon zo a sihi!’ tiah ka ruat.
Asinain bomnak dilih ka lo kawh tikah ka aunak aw i thei thotho.


Leitlun harsatnak ramih kan tlanleennak ah vei tampi cu thinphang le mangbang vansang ih kan um caan a tampi ttheu ding. Cumi tikah Pathian kan hngilh pang ttheu.


Kan lungawi caan le kan lungkim caan ah Pathian thangtthat a awlte ko nan kan harsat ngaingai caan ah Pathian rinsan hi a har zet ttheu.


Pathian in in umpi lo asi hmang kan ti lai caan, kan harsatnak lak khalah Pathian cun in umpi ringring. Amah rinsan ih kan nunnak hlanaw in a hnenih thla kan cam tikah hnangamnak in pek ding asi.


Hiti'n thla kan cam pei;
"Ka nunnak cu na kut sungah ka lo hlan. Maw Bawipa, i hum hram aw; Nang cu rintlak Pathian na si." (Saam 31:5)


Saam 31:24
Bawipa ah ruahsannak a neitu pawl cu cak le ral ṭha in um uh!


Pathian kan rinsan ngamlonak le a hnenah ralttha zetih ruahsannak neiin thlacam kan ngamlonak hi kan sualnak ruangah asi thei.


Duhdawtmi unau, na sualnak in na tlinglo, na tlaklo ti'n a lo hringhro rero asile Satan ih bumnak men asi. Pathian hnenah na sual phuangin ngaidam dil awla a lo ngaidam thluh ding. Pathian in ngaidam theilomi sualnak a neilo, a hmai ah lungkuai sualsiir in a ratu poh cu a cohlang asi.


Cule na hnenah ka sualnak cu ka phuang; ka thil tisual mi pakhat hman ka pheh lo. Ka sualnak cu na hnenih phuang dingin ka ruat cat; Cule nangmah in ka sualnak cu i ngaithiam ṭheh a si. (Saam 32:5)


"Pathian hmaikaa ah kan thuh theimi sualnak a umlo, curuangah thup lole suup loin phuang sawn awla a lo ngaidam dingih luatnak na ngah ding."








Pathian thlawsuahnak ..... na hnen um hram seh!!!

HTML Comment Box is loading comments...