June 27, Nitin Van Mana
Job 8-10, Dungthluntu 8:26-40

Job 8:6
Na thiang ngaingai ih na fel taktak a si ahcun, Pathian in a ra lo bawm ding ih na innsang a lo tungding sal pei, laksawng tla a lo pe ding a si.

Job ih rualpipawlin Job ih tuarnak hi a sualnak ruangah asi, a thianhlim lo ruangah asi ti'n an ruat.
Pathian hi mitthapawl thlawsuah petu le mi tthalopawl hremtu tluk ah an ruat.

Caan tampi cu Pathian hi thutthentu, sualnak cu sualnak vekih hrem, tthatnak cu tthatnak vekih malsawm ti'n leidaan in kan ruat pang ttheu. Harsatnak kan ton tikah "Bawipa, ziangah hivek dinhmun i thlengter" kan tiih Pathian kan mawhthluk. Asinan khatlam ah kan theih dingmi cu amah a riantu zumnak ih rinsantlak zetzet pawl khal thah an tuar thotho, harsat manbang vansannak an rak tuar thotho.

Pathian cun kan parah siatnak thleng dingin khua a khang dah lo. Kan tluksiatnak dingah le kan rilhbahnak dingih khua a khang ringringtu cu Satan sawn asi. Lei harsatnak ruangah Pathian kan phatsan lo ding a thupibik.

Dung 8:39
Tidai sung ihsin an hung suah tikah Bawipa ih Thlarau in Filip cu a lak hlo. Cuih bawi in Filip cu a hmu nawn lo; a sinain lungawi zetin a inn lamah a tlung.

Pathian thu kan nunnak ah a nungmi thlaici bangih tuh in a umih hna a ttuan asi ah cun hiti'n asi.
Filip in thuthangttha a sim. Ethiopia mipa in a zum. A sungah Pathian thu a nung.
Filip cu a hnenin lak hloh asi ko nan a lungawinak cu a tang ringring lai. Kumkhawdaih asi.

Kan kiangkap ah thuthangttha in simtu le thazang in pektu ding an um nawnlo lai caan khalah kan sungih zumnak thutak a nung taktak asi ah cun kan lungawinak cu a hmun ringring ding. Kumkhawdaih asi.



Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...