Tulai kan Kawlram sungah mi tampi pungkhawmaw in zinzawh an nei rero,kan dung zarh tu bai te in hmun dang dang ah an tuah nasa ih, a hleice in meisa(electric) tha te ih ngah thei ding beisei in an tuah rero mi a si. A then a dang tla a um phah phah ko Cetzung ih hlawh mal tuk hlawh kaih duhnak ruangah tla a um phah phah, a dang dang thu ruang khal ah zinzawh in cozah theihpi ding in an tuah mi a si.

                 Himi kan thlir let tik ah kan ram ukawknak in hmailam kan pan nasa ti cu el theih a si nawn lo.A liamcia mi kan dung kum malte hmanah theih ding a khat zet. Hmaihngal takih hivek tingamtu(khuakhang ih tuansuak ngamtu) an um tla an uar um nasa. Cozah raalkap pawl khal in an kham phah rero ko. A hlan vekih vuak leh thawiawk cu theihding a mal deuh thlang a bang. Acozah khal in cuti men in a ti ngam nawn lo in ka ruat. A lungawi um tuk ka ti.

                 Kan ram thangso ding in meisa kan tul nasa. Meisa kan nei a si len kan ramah IT thiam an pung deuhdeuh ding, computer lam ah kan thang so deuhdeuh ding, kan ram in fimthiamnak ah hmailam kan pan sinsin thei ding.Cetzung lam hnatuan tu pawl khal in tu ai ih cak sawn in hna an tuan thei ding. A thang so zo mi ram pawlah cun meisa hi an ret thupi tuk lawmam, an nunak pakhat si zik te tiang in ka ti ko. Minute 1 hrawng meisa an ngah lo caan hman ah mitampi’n lungawi lo in cozah an sawisel ciam theu. An hrangah cun minute 1 sung meisa an ngah lo khan an hnatuan mi tampi a hnaihnok thei ruang ah a si. Ziangah tile computer hmang in, internet hmang in,rawlsuan ziang kim ah meisa an hmang  ruangah si.

                Si nan, kan ram ah cun hmunpi ih company sang deuh ti lo cun cutin computer hmang ih sumdawn,pursum leilawnnak kan nei tuk lem hrih lo, internet tivek hmang ih hnatuan tla kan mal deuh lai. A dang zawng in, a hlan khan ih sin meisa tha tak te in rak nei thei, rak ngah ring ring si bang seh la sumdawn nak ah le a phun phunah tu ai in kan ram leh kan nuntu khawsakdaan(living standard) a thangso nasa zo ding tin ka zum. Politicians pawl khal a hlan ai in an lang uak deuh thlang ih, ram that nak hrang beisei ih tuan ngam tu tla kan pung sinsin. Kan dung kum 2008 ih phungki zinzawh tum ah cun kutke leh hriam hrei hmang in raalkap in an rak kham nasa ih tu ah cun Yangon leh Mandalay khawsung ngai ngai tivek ah cun cuvek ih kutthlak ciamco a mal sawt ti kan zaten kan hmu thei.

                Tu ih meisa tha tei ngah thei ding ih an dil rero nak khal ah raalkap in an kil phah phah ko hmun tin ah. Tu ah state leh division tam pi ah hi mi meisa hrang zin an zawh rero lai ih ni hnih thum an hmang zo nak tla a um. Kan tul tuk ngai riai si, khawpi deuh ih um hrang ah tla cun nitin kan tul bik mi lak ih pakhat a si ve, rawlsuan nak ah an hmang, tidai pump suah a tul ih cumi pump nak ah an hmang, tlawng pawl ah computer hrang ah an hmang, hmunpi deuh ah cun meisa lo in cun ziang hman tuah a remcang thei ngaingai lo.

                Kan nih Laitlang lam leh Kawlrawn sehvel ih um pawl hrang ah cun a hlan ih sin kan rak nei cuca lem lo ih meisa a thupit zia tla kan rak thei tuk lo. Meisa ngah sehla cu hi ai in kan ram, kan khua leh kan miphun in tam pi hma kan sawn phah ding. Kan hnatuan mi khal tu ai in a cang kang in a hahdam phah zet ding. Thil tha zir ih tuahsuaktu, tuanngamtu kan tul hrih lai nasa ti uh.  Lungawi…

By:Salai H.Lun