Nang ngaih a luar, caan her hmuah sung,
    I hnemtu ding, nanglawng ka lo tul,
Duhnak aan neem, ka hrang minunfu bang;
I ra fahsal, khuaizuu bang nunnem aanka te.

      Biathu hlan ing, lungthin thuanthu,
    Cem ni um lo, simrel cawk lo,
Tlanghra dang seh, na thlamphen te hlenhli;
 Ka kiang silo, ka lungthin sawnah na zee.

      Kan thu tiam tla, va philh siang hlah,
     Ka rinumnak, ka hnuk hluan tiang,
 Leng lak thabik, Val lakih duhbik nak thawn:
Na hrang ka siar, nithla, arsi leh kumthar

“Congthu Fa”

Merem zo hnu … lunglen a thosal!
Kan khua dildel … lung a ti zur!
Luahtu um lo … ramthing ah na cang!
Cumci, mero sum a bawmnak ram
Kan khuasuah rinim le kuakuai cungih
Thuro lungleng zai awih, ngaitu um lo!
Niling, vanruah hman ngaihsak man lawn
Lo rian na tuannak ram te, mual a liam ta maw?
Ramsa tintian ruuninn ah, a cang zo si!
Khuasa tu’i lungthin, ziang a bang ding?
Khuanu’i tang’h , lungdam ten na cawl
Piallei ramdai … len lai na iang!
Pacang tha le valno rual tla’n, ruat cio hai maw
Sul ih hnuah, canter siang lawn …
Sawngsal hna … thiam nungna maw …
Kan khua le ram … din tharsal in …
Congthu fapawl … kan lengza ding
Vairang khua pi hluan’n, kan rem tha ding!
Congthu fapawl, kan duai ce lo!
Khua nui thlawsuah, kan dawng hleice!
Mifim, mithiam … kan pung, kan karh!
Kawlmimang bawi … hluan in kan leng
Cungtlun thleng cia … kan pupapawl ’h
Thlawsuah malza kan dawng, nonawn san ah!

“Lungkuai Thahniang”

Annka bia khuaiti hluantu …
Nang ngai in, lung lam ka vai
Lungkuai thahniang, ngairiamnak ah
Lungthin muril fan in a luang … mitthli

Ka bu sungah ka lo ngainak catlar a khat
Mizan ka lo ngainak mitthli ka bur …
Ka sulh siang hrim lo, sul ih hnu pawl
Duh thu hlan man lawn, tlanghra na liam!

Ziangtin, ninu liam ka siar ding?
Luaithli a dir, dairial ti hluan in
Ka ruh a zun, na zuunkhung hin;
Ka phat ngam lo, ka lo duh ngaingai!

Ka pai sak mi kan ruuninn ah
Lu zing in ka zau, sunnidir
Ka lo ngai vang … rawl tiang ka nuar
Lung aa koin i tuah na maw, duhdawtnak cun!

“Na Nu Ruat In …”

Lungduh co ding, vanglai ni a liam …,
San thuanthu ih, san lai iang te …
Na sulhnu ah, ka cang ta si!
Keelawh lai teh, um nawn ing maw?
Rua thler bang len, kan thenawk hnu!

Ka suan vawr leh ka lungduh cu …
A nui tang ah nuam in a leng ta maw …
Sunglawi seh ti ih, ka lawm theu mi
I cawimawitu tiin, ka zoh theu fawn
Ka lo duh vang, ka tuar a na …

A lo hringtu … na nu ruat in,
Ka tangnem cu … na liam san si …!
Ka thin a buai … na liam zan kha …
Na thu tinkim … ka ruatkir can,
Na zuun ngaih hi … a thar sin theu!