DAWTNAK NI ENGMAWI
Tuesday, 14 February 2012|
CHIN SANTILUAN
Hngakhlap zetin ka rak thlir
Na ratnak ding lamzin cuanphah in
Ka ruahnak hmuah cu na thulawng a leng
Hni siamsi te'i ka lampanih
Dawtnak mithmai pu ih a ra tu ka valdawt
Zohning thei hlangee a hmel duhnungte
Ka kut nemte rak lo san in
Dawtnak mithmai ka lo pek ve
I kaihnget in i pomhnget hram
Lungkhat hmun in nang leh kei hrang
Dawtnak parmawi parsuak seh law
Do tu pawl hmaiah kan uai lo ding
Kham tu pawl thuah kan buai lo ding
A fek mi duhawknak cun cahnak in pe ding
Lungphang hlah law! ka nunnak caan hmuah
Na hrangah pe in ka lo hlan na hnenah
Leilungtlun mipum siarcawk lo lakah
Valmawi zarual an len laiah
Nangmah lawng maw ka lung in tawng thei!
Nangbang dawttu kei ka lo nei hi
Cung khua nu'i hnen lungawithu simcawk hlah ee
Harsatnak cu kan karah lenglai hmanseh
Tuanzairel tul in kan umnak tlang in dang hmanseh
Kan ruahsannak kan kaihnget ding
Harsatnak leh hlatawknak in
Nang leh kei dawtnak an then lo ding
Na riahsia hlah aw!
Veikhat te in kumkhua hrangah ka lo duh val nang
Ka parmawinak na hrang si seh
Na parthatnak ka hrang si in
Dawtnak ruuninn mawi kan sak tlang ding
Duhdawtnak,rinumnak leh ngaidamawk theinak in
Kan ruuninn cu kan ceimawi ding
Theihthiamawknak in kan dinhnget ding
Ziangtluk nuam ngai nang thawi caan hman cu
Ka lo duhnak, in duhdawtnak cu
Cungvan Arsi hnentiang eng camcin in
Mikip hmuah in in lawmpi ve hai ding
Hngilhni a um lo ding san a cem tiang in
Mikip hmuahih lawmpi tlak
Nang leh kei DAWTNAK NI EMGMAWI !!
By, Hausum Fanu
Posted in
HTML Comment Box is loading comments...
0 Siartu Aanka for this post
Comment Rak Pek Ve Aw..!