Pakistan,Swat tlangte karlak ah Taliban pawlin thah an rak tum dahmi tlawngta nauhak nute Malala ih lusung ihta meithalmu cu doctor pawlin an phorh suaksak thei zo.
                Nauhak nunau pawl tlawngkai theinak ding hrang leh nunau pawlin rights(minung covo) an ngah ve theinak ding hrang a zuam rerotu kum 14 mi tlawngta nauhak nute Malala ih hriselnak lam cu thaten an kilkhawi thei vivo thlang ding tin Pakistan doctor pawlin an sim.
                Tihni sun(nihnihni) ah tlawng ihsi an ra tlunglai Taliban meithal kengtu pawlih an donak ah a lu ah meithal in an kap ngah. Adang tlangta nunau pahnih tla an kap ngah ve ih hliamhma an tuar ve.
                Taliban pawlin Swat tlangpawng an lakih kum hnih rei cumi lai ah Malala cu kum 11 mi lawng a rak si. Cumi caanlai ihsin an mai umnak hmunih cengtu nunau pawlih thuhla hi diary a rak ngah dah zo.
                Taliban helpawl kuthnuai ih umtu minuang pawl ih thuhla khal a rellang theh. Amah Taliban pawl ih an donak cu Pakistan minister leh cozah in nasa takin an hua ih US foreign department khalin hihi rapthlakza sualnak, mi tihhrut hnatuan a si tin an rak sawisel ve.
                Taliban heltho pawl hin politics leh ukawknak thuhla pawl ah biaknak lam thu thawn rawi hlah uh ti Malala in thu a coktho ruangah an donak a si tin an rel bangtukin Islamist heltho pawlkawm pakhat khalin tuitum an donak ah a thihni a kim hrihlo ih a nungdam konan hmailam vivo ah dam in zuah a si cuang lo ding tin BBC hnenah thu an rak than ve.
               Malala leh a rualpi tlawngta nunau pawl parih cangmi thil hi Swat tlangpawng karlak ihsin Pakistan rampum ah leh leitlun pumpuluk tiang a dengsuak theh zo a si.
              Pakistan, Peshawar khawpi ih tlangta nunau nauhak pakhat in Malala hi an naunu nute a si, a rang thei bik ih damnak ngahsal dingin thla kan camsak rero, a aw te dai ding ko Taliban pawlin an do nan Taliban pawlih tuahmi cu a sung zo ta riai tin a rak tannk thu a sim ve.
             Tuah Malala cu Peshawar ih siizungpi ah a um lai, a tul len ramdang siizung ah kuatih va tuamhlawmnak ding hrang siizung hmanmi thilri kimfel tak thawi tiari ciami vanzam pakhat khal in a hngak cia ringring ti a si.
Malala hrang thlacam saktu tlawngta nunau nauhak pawl

HTML Comment Box is loading comments...