United States of America ih zukmi Islam biaknak hmuhsuamnak ti an timi zuknung thawn pehpawr awin duhlo ih zinzawhnak Egypt, Tunisia, Sudan, Indonesia,leh Malaysia ram pawl khalah a karhzai vivo.
        Egypt ramih zinzawhtu pawlin American ambassador ra dingih an tum laiah palik pawlin mitthli tlakternak bomb an puah ih an zaten Tahrir Square ah an tlun ter theh sal.
        Ambassador zung kiangkap hmuahah hling neimi hri pawl leh palik pawl in an kulh thepthep theh.
        Egypt president Morsi in ambassador zung an donak cu bansan dingin a sim hngai ih himi zuknung thawn pehpar awin leitlun khuazakip ih lungawi lonak langter ding zinzawh dingih an sawmawk nak pawl cu Muslim unau pawlkawm in an hnukdawk kirsal.
        An nih pawl hin an duhlonak lawng ti lang an tum mi sawn a si ih adang thihhloh nak leh siatsuah awknak pawl um ding a si nawn lo an ti.
        Ahlan deuh ahcun Lybia cozah pawlin American ambassador, Mr.Christopher Stevens a thihnak Benghazi myo American ambassador zung cu tlawngkai nihnih ni ih an donak thawn pehpar awin mi tamtak an kaih thu an rel. Thuthang pakhat ahcun Ansar Al_Sharia tiih kawhmi ralthuam keng hopawl lak ihsin mi pali cu an kaingah tin an sin bet.
        American ramih an zukmi zuknung ah Islam biaknak hmuhsuamnak ti an timi thuhla ih zinzawhnak an tuah rero laiih American Ambassador to Lybia an rak do mi a si. Lybia vuangyi thar Mustafa Abu Shaqur in himi thilcang mi pawl ruangah Lybia leh American lakah buainak zianghman um ding a duhlo thu a sim.

HTML Comment Box is loading comments...