A cakzetmi linghnin pahnih pehcih awih an cang ruangah Iran ramah mipi 250 an thi zo ih mipi 1800 hrawngin hliamhma nasa tak an tuar.
              Tuih linghnin cangnak hmun hi Tabriz myo leh Ahar myo kiangkap ih cangmi a si. Sinan, hiti thihhloh leh natnak a tuartu pawl cu myo sir ih cengmipawl khawte mi pawl an tam bik. Khua khat leh khat biakpawhawknak ih hmanmi telephone hri pawl an siat theh ruangah runhimawknak an tuahnak a fung ter phah ti a si.
              American ih geologist pawlkawm pakhat cun "Himi linghnin pahnih hi an cahlam 6.4 leh 6.3 veve an si"tin an sim.
              Khawsung mipawl cun himi linghnin ruangah tih leh khur in an um.tin Tabriz khawsungmi pakhatin BBC news hnenah a sim. Mi zate in lamzinpi parkai an cuhaw luihlo rero ih ambulance car authawm khal hmuntin ah theih ding a um ti a simbet.
              Iran, a hmailam Izarbaijian ramthen sungih  Huris leh Varzaqan myo pawl khalah linghnin hi nasa takin an rak tuar ve ti Runhimnak Commitee ih hotu pakhat sive mi Mr Khali in cozah TV sungah a relsuah thu AP news in a ngan lang.
             A veikhatnakah 6.4 ih cakih ling a hnin hnu minute 30 ah 6.3 ih cak linghnin pakhat dangin a thlun lala mi a si. Inn thenkhat pawl cu a hrekin tla a tan vurvi ih a thenkhat pawl leh thung cu lak ding um lo in a siatbal theh.  Culawng silo linghnin fate tak tete vei 18 lai a cang bet zo. Mithen cun an sungkua leh unau hawlin kawm leh ker lakah an hai ciamco.
             Hotu pawl cun a dang a bet vivo thei lai ruangah a tihnung tuk fawn siih a lenglam hmun thatnak bualrawn tivek ah um dingin a cah hai. A malbik ah khua pali cu zianghman um nawn loin a nuai darh thehih a hrek asilole 70% hrawng tiangih a nuaisiat thehmi khua hi 60 ai mallo a um tin zingzawitu pawlin an rel.
             Thilsia, thilcim leh kekkuai lakih si an runhim ngahmi minung 200 hrawng cu himten runhimnak tuantu pawlin an run ngah ih mithi khal an hmuhbet vivo ruangah mithi zat cazin khal a pung so vivo ih tu ai ih tam an hmuh vivo zum a si thu hotu pawlin an relsuak. Sun zan tiloin runhimnak tuantu pawl cu an tha neih hmuah suahin an tang rero lai ko. Sinan, mipi pawl cu zan khal itthat thei loin tih leh thlabar in an um rero ti Tabriz khawsungmi pakhatin a sim ve.

             
            Tabriz khawpi...zianghman a canhlan...

            

HTML Comment Box is loading comments...