July 28, Nitin Van Mana
Saam 46-48, Dungthluntu 28


Saam 46:10
Amah in, “Nan do awknak cu baang thlang uh, Keimah hi Pathian ka si kha thei uh; Miphun hmuahhmuah tlunah bawibik ka si ih leilung pumpi tlun khal ah bawibik ka si thotho,” tiah a ti.

Ui le Mee bangin, ...
Milai hi khat le khat kan ralaw,  phunkhat le phunkhat kan el-aw, pengkhat le pengkhat kan zuamaw, tlangkhat le tlangkhat kan thleidangaw,  ramkhat le ramkhat kan do-aw, ... Lal kan cuh, uktu si kan duh, bawibik, thiambik, fimbik, theibik, neibik, "A BIK-BIK" si kan zuam cio. Zangruangahtile, Bawibik cu Pathian asi ti kan theilo. "BIK" cu Pathian hnen lawngah a um ti kan fianglo ruangah asi.

Pathian hi Bawibik asi ti thei ringring awla, bawibik sinak, lalbik sinak, fimbik le thiambik sinak hmuahhmuah amah pek ringring aw. "BIK" cu Pathian ta asi. Cuti'n taksa le thinlung zonzai rethei fahranih midang na zuam rero le na dokalh rero a ttul nawnlo ding. Cule nun-hnangamnak na ngah ding.


Dung 28:3
"Paul in thinghreu a va khawm ih meipi-ah cun a thlak. ..."

Ziangmi na hmu thei?
Paul kha thawngtla asinan Pathian ih a umpitzia a theih tikah amah kiltu Rom ralbawipa in a ttihzah ih a upat zet, cun a nunnak tiang a hum. Paul cu tangphawlong ihsin a luatmi zate (Rom ralkappawl, thawngtlapawl, tangphawlong hnattuanpawl) lakah hotubik dinhmun a ngah. Asinan tikulh an thlenin meipual sepih an ai tikah amahbik kha thinghreu va khawmtu ah a ttang.
Bawi hmerhmer le lal berberih um thei asiko nan, amahbik mi riantu a cang. Dinhmun niambik hnattuan a ttuan thutho ko nan upat ttihzah a hlawhbik thotho.

"Sinak le dinhmun sang kan thlen ruangih miih in upatmi cu rei a daihlo ding. Bawipa riantu kan siih Pathian thu kan nunih a um ruangah miih in upat asile kumkhua a daih."


Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...