July 17, Nitin Van Mana
Saam 18-19, Dungthluntu 20:17-38

Saam 18:1
Maw Bawipa, ziangtluk in so ka lo duh! Nang cu ka cahnak na si.

Himi Saam 18 a ngantu hi David asi. David cu kan theih bangin raldo rinring asi. Bawipa a ttihzah ih thu a ron hmaisa ringring tikah ral a donak ah a neh ringring. Curuangah Pathian a duhdawtzia a rel tik khalah "Ka cahnak asi ruangah Bawipa cu ka duhdawt" ati.

Fala le tlangval khalin khat le khat an duhdawtnak thu ah an sutaw ttheu; "In duhdawt ngaingai maw? Ziangruangah in duhdawt? In duhdawtnak a san rel ding na theih lo cun in duhdawt taktak lo tinak asi" ti'n. Pathian kan duhdawtnak ah teh ziangti'n? Kan duhdawt taktak ahcun kan duhdawtnak a san kan rel thei a ttul.  Rel ding kan theihlo ahcun kaa lawngih ti mentu kan si ding.
Bawipa in theih a duh!

"Bawipa na duhdawt taktak maw? Ziangruangah na duhdawt?"


Dung 20:22-24
Cule atu-ah Thlarau Thianghlim ih hruainak thlunin Jerusalem ah feh ka tum; cutawkah ziang ka cang ding ti zianghman ka thei lo.
Khawkip ah thawngtlak le harsatnak lawnglawng in in hngak a si ti lawng kha Thlarau Thianghlim ih ralrin peknak thawngin ka thei.
Sikhalsehla ka hrangah ka nunnak hi zianghman ah ka siar lo; Bawipa Jesuh in ṭuan dingih i pekmi Pathian ih zaangfahnak Thuthang ṭha phuan ding ṭuanvo hi famkim zetih ṭuan thluh thei ding lawng hi ka saduhthah a si.

Paul ih san lai ah "Jesuh cu Bawi asi" timi thu a phuangtu pohpoh cu thah theih, thawng thlak, vuak le velh, lutan lole lungto ih denthat an rak si. Cumi cingin Thuthangttha cu raltthazetin a rak phuang. Thazang rak lak cio uhsi.

-Thawhhlawm tampi na pek asile cumi na tuar ding titu na nei maw?
-Thla na cam asile cuti'n hrem na si ding tiih hriinghrotu na nei maw?
-Thuthangttha na phuang asile vuak na si ding tiih lo khamtu na nei maw?
-Mifarah le hngakttah na bawm asile velh na si ding tiih lo dawntu na nei maw?
Asile ziangruangah,
Thawhhlawm pek kan daithlang? Thlacam kan huamlo? Thuthangttha kan phuang duhlo? Mifarah le hngakttah ziang kan siarlo? Pathian hrangih kan ti theisunmi tete cu a um ko nan...

"A lo duhdawt tukih na hrangih a nunnak tiang a pektu Khrih Jesuh na duhdawt taktak maw? A hrangih nun ding na ngam maw?"



Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...