June 24, Nitin Van Mana
Job 1-2, Dungthluntu 7:22-42

-Job Cabu Thuhmaihruai ihsin,

"Job cabu hi miṭha pa pakhat harsatnak nasa zetih a tuarnak thu a si."
Mittha hin harsatnak an tuar dah lo ding ti'n a awlzawng in kan ruat mai ttheu.

Thu umdaan cu kan parah harsatnak a thlen tikah, "Ziang sualnak so ka tuah?" kan tiaw ttheu.

Ngaite'n kan tuarmi harsatnak khal hi kan nun in tthangtertu ding le thlawsuah tam sin kan co theinak ding tla an si thei. (James 1:2-3)

-Job 1:4-5
A fapa pawl cun a haha tein rawl ei puai an tuah ṭheu ih hmun khatah rawl an ei khawm ṭheu; an farnu pawl tla an sawm ṭheu. An puai a cem tikah a thaizing zingpitah Job cu a tho ih a faate pawl thianfaiternak ah thawinak a pe ṭheu. Tumtah hrimnak um loin Pathian an hmuhsuam ding ih an sual pang ding ti a phan ruangah cuticun a tuah ringring a si.

Job hi a fatepawl parah ttuanvo neh zettu asi. A falepawl a cawm neh daan, a kaihhruai daan, an hrangih thawinak a pek daan pawl hi zohtthimtlak zet asi.

Tefa kan neih tikah tisa hrangih an in-ei ding, an fimthiam zirnak, an nunkhawsaknak thuhla ah siseh, thlarau lamah Pathian thu thei in lamzin dik an hmuhsuak ih an zawhnak dingah "Pa" hin ttuanvo tumpi kan nei.

-Job 1:12

Bawipa in Satan hnenah, “Na ti bangtuk cun siseh. A neihmi hmuahhmuah na kut sungah a um. Amah Job lawngte na siatsuah lo pei,” tiah a ti. Cule Satan cu a feh.


Satan in Job a hniksak nak ding hrangah Pathian hnenah siannak "permit" a lak ta. Pathian ih siannak tel loin Satan in Job parah ziang thu hman a thlenter thei lo.

Pathian fate kan si kan ti tikah umzia a nei zet. Pathian ih humhim mi kan si. Curuangah pan parih a thlengmi harsatnak le thlemnak ziangvek khal Pathian ih siannak thawngih thlengmi an si. Pathian cun a fale hnenah "Na neh hrimhrim a ttul ding" ati. (Seemtirnak 4:7)


-Job 1:20-21

Cutikah Job cu a tho ih riahsia in a hnipuan a thlek ṭheh. A sam a meetkolh ṭheh ih leilung ah bok tahrat in, “Lawngfangkheh in ka suak ih lawngfangkheh in ka thi ding. Bawipa in i pek ih atu-ah a lak sal. A hmin thangṭhat si ko seh,” tiah a ti.


Ka nei, ka ta, ka ngahmi, ka covo ... ti'n leitlun thilri le hminthannak hi kan suang pang ding ti a phan um. Job cun a nui' pum sungih a suakkeh lai a theifiang tuk. Lawngfangkheh in kan suak!

Kan neih le siah ziangkim hi, ...

Kanmai' ta ah kan ruat asile sunralnak kan ton caan ah a tuardaan kan thiam thei ttheu lo kha. Pathian ih pekmi Pathian ta asi ti thei in Pathian hrangih hman ding asi.


-Job 2:10

Job in, "Pathian in thilṭha in pek tikah kan lung a awi. Harsatnak kan hnenih a thlenter tikah ziangah so kan phunzai rero ding?” tiah a ti. Hi bangtuk in a tuar nain Job cun Pathian parah ṭongsia kamkhat hman a ṭong lo.


Job hi nundaan a va thiam ve aww.... ka ti. Tampi neih khal a thiam, malte naih khal a thiam, neih lo bembem khal a thiam.

Bawipa in in zoh in in thlir ringring. Nang le kei hi a thlawsuah cotlak kan si maw silo? Kan hmuhtonmi ziangkim ah "Pathian parih ttongsia" kan ttong lo ding a thupi tuk. Cumi cun kan hmailam caan hrang lei in rel ding.

"Mi tampi in Job vek cu Job pakhat lawng a um ding. Zo hmanin kan bang thei dah cuang lo ding." anti.

Job bang tumih zuam dingin ka lo sawm lo, kanmah le nunnak cio ah Job ih thuanthu ihsin zir dingin ka lo sawm.


Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...