Esther 3-5, Dungthluntu 5:22-42
June 21, Nitin Van Mana

Esther 3:2
Siangpahrang in a kuthnuai ih hnaṭuantu hmuahhmuah hnen ah, “Haman cu nan upat pei ih a hmai ah khukbil in nan lu nan kun pei,” tiah thu a pek. Curuangah an zatein Siangpahrang ih thupekmi vek cun an tuah. Asinain Mordekai cun a tuah duh lo.

Kan ruat ngelcel dah maw?
Buddhist phungki tlawng sungah kedam phoih ih luh a ttul. Cumi cu an pathian upat ttihzahnak ih an tuahmi daan asi. Curuangah Buddist phungki tlawng sungah na lutih na kedam na phioh asile an pathian hnenah upat ttihzahnak na pek tinak asi. Ruat hnik! Kan Pathian cun keimah lo Pathian dang biak hlah a ti. (A ttul khalah a ttullo khalah kan Pathian phatsan tahratin pathian dang ttihzahnak na ve pek ding hnak cun an phungki tlawng sungah lut lo lawlaw mai aw tiah ka lo duh sak!)

Kan kiangkap ah mitin miza in Pathian nung an biakih an thangtthat lai ah cun rak biakih rak thangtthat ve a awlte ko ding. Asinan kan kiangah zumtu si maw, Pathian thu ih in kaihruai theitu ding pakhatkhat an um lo lai caan ah cun, nun caurau ih tluk lok mai a awl zet. Hminsintlak zetmi cu kan kiangkap ah Pathian nung biaktu zohman an umlo lai caan khalih Pathian ttihzahteih kan nunnak khan Pathian hmin a sunglawiter ih thlawsuahnak kan conak hrampi asi.

"Pathian biaktu zohman an umlonak hmun khalih Pathian ttihzahteih a nungtu cu Pathian in a cawisang ih thlawsuahnak a pek tengteng."


Dung 5:41
Dungthluntu pawl cu Khonsil upa pawl hnen ihsin an suah tikah Jesuh hrangah ningzah mualpho tuar dingin ruah an si ruangah an lung a awizet.

Himi ka von siar cu ka thinlung in khioh nguihngo nasa!
"Jesuh ruangah ziangmi ka tuar dah?" tiin ka sutaw nasa.
1) Jesuh ruangah ningzah-mualphonak kan tuar dah maw?
2) Jesuh ruangah tihal-rilrawnnak kan tuar dah maw?
3) Jesuh ruangah vuak le velh kan tuar dah maw?
4) Jesuh ruangah humhsuam-nautatnak kan tuar dah maw?
5) Jesuh ruangah thuphan puh kan tuar dah maw?
6) Jesuh ruangah riahsiat-ninghannak kan tuar dah maw?
7) Jesuh ruangah miih hnon kan tuar dah maw?
8) Jesuh ruangah miih relsiatnak kan tuar dah maw?
9) Jesuh ruangah sulralnak kan tuar dah maw?
10) Jesuh ruangah thawngthlak na tuar dah maw?
11) Jesuh ruangah caannak na tuar dah maw?

"Jesuh ruangah kan tuarnak a tam poh le Jesuh ruangih kan lungawinak a sang sinsin."


Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...