Esther 1-2, Dungthluntu 5:1-21
June 20, Nitin Bible Casiar

Esther 2:20
(Esther in) nauhakte a si laiih a thu a rak ngai vekin atu khalah Mordekai ih thu cu a ngai a si.

Esther ih hlawhtlinnak cu Mordekai ih thusimmi a ngai ih a zirhmi vekih a thlunnak thawngin a thok.
Mordekai cu Esther duhsak zettu, ruat zettu le duhdawt zettu, a pa ngai asilo nan a fanu vek rori ih zohtu asi.

Mi zo khal kan kiangkap ah Pathian in kanmah in kaihruaitu ding pakhatkhat cu in ek cio.
Nun in simih in zirhtu, in duhdawtih lam in hruaitu, in ngaihventu le in duhsaktu ...
"Kan nulepa, kan ulenau, kan ruallepi, kanmah thawn a pehparawmi mi pakhatkhat..." kan nei ringring.
Zovek milai khal mahte lawngih um a theih lo. Kanmah thawn a hnawihnihawmi le a nai-awte mi an um ringring.

"Pathian ih pekmi in duhdawttu milai ih thusimmi kan ngainak hi kan hlawhtlinnak hrampi a rak si ttheu."


Dung 5:1-11
"Ananias le Shafira thu"

An neihmi hmuahhmuah an zuarih a hrekkhat an thup. A hrekkhat lawng Pathian hnenah an rak keng.
Cule a zate'n kan rak keng tiah thphan an per bet. Curuangah an pahnih in an thi, direct rori in.

Pathian bum a theih lo. Pathian hmaikaa ah thuphanper a theih lo.
Pathian thawi pehparaw in zianghman thinlung thup nei tum hlah aw.
Na thinlung, na ruahnak, na khaekhannak, na ziangkim felfaite'n simtlang thluh aw.
Na bum le na cem! Na sinak vekin sim awla a lo cohlang ding.

"Bawipai' in duhdawtnak a thuukzia cu kan sinak vekih in cohlannak tak khi asi. 'Ka sual' a tiawtu, misual in cohlang ih kan sualnak in ngaidam."

Misual lo kan um lo. Pathian in in thei thluh. Na sinak vekin Pathian hnen ra aw.... A lo ngaidam ding.
"Sualnak kan nei lo kan ti ahcun kanmah le kanmah kan bum aw ih kan sungah thutak a um lo. Sikhalsehla Pathian hnenah kan sualnak kan phuan ahcun zumtlak le a dingmi a si ruangah kan sualnak in ngaidam ding ih kan mawhnak hmuahhmuah a thiangfaiter ding. Asinain sualnak kan tuah lo kan ti ahcun Pathian cu thuphanper ah kan canter ih a thu kan sungah a um lo a si." (1Johan 1:8-10)



Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...