Nehemiah 12-13, Dungthluntu 4:23-37
June 19, Nitin Bible Casiar

Neh 12:43
Cuih ni ahcun thawinak tampi an pe ih lungawinak thawn an khat, ziangah tile Pathian in lungawizet dingin a tuah hai.

Lungawinak in pek theitu, lungawizet dingih in tuah theitu cu Pathian asi.
Milai in lungawinak kan tuahmi cu camkhatte lawng asiih ramri a nei. A pawnlang men tla asi thei.
Pathian hnenin lungawinak taktak na co ngah zo maw?

"Pathian ih lungawi zawng raithawinak pek awla, Pathian in lungawinak a lo pek ding."


Dungthluntu 4:29-30
"Maw Bawipa, atuih in hro reromi tla hi nangmah in run thei hram awla kannih na sal pawl tla hin na thu cu ralṭha zetih kan sim theinak dingah in bawm hram aw. Mi damnak dingah na baan run pharh awla na Siahhlawh Thianghlim Jesuh hmin in hmuhsaknak le khuaruahhar thil pawl tuah theinak in run pe hram aw,” tiah an ti.

Zumtu hmaisabik pawlin nasazetin Pathian hna an rak ttuan. Ziangah tile an thlacamdaan hrimhrim a danglam.
Hringhronak le hremnak lakih raltthatnak le mangbangza thilti theinak an rak dil. Thlacam rori'n an rak dil ve asi.

Tuisun ka lennak inn ah nupinu pakhat kha kan kawhhran fund hawlnak hrangih tuahmi lucky ticket ka zorh phah ih in lei zawngah a timi cu, "Ka poh fuh nak ding hrangah thla in rak cam sak awla ka poh lo khal le Pathian in rem a tilo tinak si ko seh" ti'n... Ka hnihsuak tuk. Hivek hi zumtui' lungput takah kan ruat pang dah kei? Lamlam ah! Zumnak neih lo tukah sawn hokhaw.

Kan hmuhtonmi ziangkim parah Pathian remruahnak kan hmuh thiam cu a thupi tuk ko.
Asinan kan duhmi cu ti thlacam in kan dilding hrimhrim asi. Jesuh khalin "Dil uh, nan ngah ding" ati.
"Bawipa ah na lungawinak hawl awla, na lungthlitum a lo pe ding." (Saam 37:4)

Ti niaknote'n kan dil pei, ...
-Tangdornak
-Thinsaunak
-Thinlung kaupi ih mi theihthiam theinak
-Pathian thu duhnak
-Mangbangza thilti theinak
-Raltthatnak
-Hlawhtlinnak
-Lamtluannak
-Nupi/Pasal ttha
-Innsangnuam
-Te le fa
-Hlasak thiamnak
-Thusim thiamnak...
... tvk pawl... Pathian in hman a lo duh, na hrangah ttul khal a ti. Hipawl hi pek a lo duh. Zumnak nei awla dilaw.


Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...