Pangpar Par Caan                               Mai Sokhlei Par
Pangpar hi a ci a si laiah siseh, a thang ih a kung dinhmunih a um lai khalah siseh, a hung kuhmum can khalah siseh, ziangvekin a par a mawi in a hmui ding ti theih cia theih a si dah lo. Cun pangpar mawi zetih hung par suak thei ding cun, phun pekte ihsin ngaihsak a tul lawng hman si loin, dik zet le a si ding dan cekciih tuamhlawm thiam khal a tul hrih.
Pangpar pakhat a mawi zat ding teih a hung par suah theinak ding le, a hmui zat ding vek tei’ a hmui theinak ding cun a tuamhlawmtui’ parah a thumaw ti a theih ding. Cuvekin, pangpar a hung par canih cui pangparih pianhmang zohin, a tuamhlawmtu (a phuntu)-ih rak tuamhlawmdan a rak dik tawk maw dik tawk lo ti theih a theih ding a si ahcun……..

********************

“Cinte, ziangtin khalam lam na rak thleng man lala! Zamrangten ra tlung……, mi’ inn len
lo ding ti vei ziat ka lo sim dah zo? Hivek thusim theih lo milai, inn na thlen le na thei lai
ding….ra…zamrang,” tiih ti ttukttawi au thawm cu Sui Sui tei inn sungah a ra thang.

Cui aw an theih veten inn sung um zaten Cinte cu an hei zoh. Cinte khal cu thlaphang mitmeng phaw kekite thawn a nu cu a rak zoh ciauci. A nui’ hmel a zoh ih cuisin a nui’ kutah a mit cu a tumsuk vivo. Cuveten a nui’ kutih a hum mi funghreu sau ngiaungiau cu a hmuih a thin a hung phu dutdo. Cuisin Sui Sui le thawi nuam zetih an lekawk lai cu a bansan ih hreh zet cingten a nu a hei pan.

Cinte cun a nui’ bazar kai cu a zum hnakih zamrang tukin a ra tlung tin a ruat phah. A nu hi
mi danglam ve zet a si ih, innhnen thawi pawlawk hnuaihni le biakawk ruri duh lo, anmah an
innsang lawng gate sungah fianrial zetih um duh pawl a si. Amah khal siat/tthat thu ti loah cun mi a pawl dah lo; len khal a leng dah lo. Cuvek thothoin a fale khal amah vekih zohman pawl loih inn sung lawngih khumawkter ringring a tum theu.

Asinan, Cinte cu kum 4 mi a si thlangih rualpi ngainat hna a thiam thlang. Cuhleiah, mahte
lawng inn sungih lehawk hnakin rualpi pawlrual thawi lehawk a nuam deuh ti khal a theithiam zo. A hung tthang deuhdeuhih leng lamih um cu nuam a ti deuhdeuh. Curuangah a nu inn a um  canah cun a nu a ttih ruangah inn sungah ti khiaukhiten um hman sehla, a nu leng lam a suah dekdo hi cun persuahnak lawnglawng a hawl theu. A nu a ra tin hlanah amahten zumhmangin a tin khelh theu nan, vei hnih-khat an lehawk nawm tuk can vekah cun a rak hngilh pang theuih, a nui’ kawk le vuak a tuar phahphah can khal a um theu. Asinan, ‘Ka rak suahnak pangpang!’ ti cun vei khat hman a siraw dah hrih lo.

Rualpi a pawl ruangih a nui’ vuak le thawi a tam poh le a len hiarnak a luar sinsin. Inn sungih um har a ti deuhdeuh, pawnpernak ding a hawl deuhdeuh. A nu leng a suah ding hi cun suahnak ding le lennak ding hmun pawl a mitmei cia ringring. A nui’ rual pawl a sian lonak san bik cu:
“Khi bang zawi nunsim lo fa, zawi fingkhaw lo fa pawl na pawl le na aa thluh
ding.” “Bote kawm ka duh lo… A pa zu in a hmang em mai.” “Ngunte khi vei khat hman be
awhlah. A nu mirel a hmang tuk.” “Tete tei inn len ka awih lo; an farah tuk, na thil an lo daw
ciamco pang ding.”

A cem thei dah lo mi phuahlam tampi thawn a dawn theu. Asinan Cinte hrangah cun a hna hman a thak lo. A rualpipawlih nulepapawl cu mi ziangvek an si hmanah anih thawn an pehparaw lo tin a ruat. A nui’ hrangah cun a “pawltlak” mi rualpi pakhat hman an um lo a si bik. Ziangahtile, a nuin, “Cumi cu pawl hlah,” lawng a ti theuih, “Cumi cu pawl aw,” tin a ti dah lo ruangah a si.

******************

Tikcu le can a hung her liamaw vivoih Cinte khal phun hra a awn zo ruangah, phunsang tlawng a kai thawk thlang. A major-pi rualpi khal a nei phahphah thlang. A hrekkhat cu nunau an si nan, a hrekkhat cu mipa tla an si.

Ni khatah a rualpipawl cu Cinte tei inn an ra leng. Mipa pahnih le nunau pathum an si. Cinte cu ti a rak khawlh laifang a si ruangah, mileng khanah a nu in a rak topi. A nu cun milengpawlih thuamhnaw hrukdanpawl cu cik zetih a zoh thluh hnuah, a sir bikih to pa cu a hun bia:
A nu : “Nang zo si na hmin?”
Mileng (1) : “Thang Za Thuan ka siih, Thangte tin in ko”
A nu : “Cinte thawn major bangaw maw nan si?”
Thangte : “Si…”
A nu : “Khui khua in na ra kai?”
Thangte : “Falam in.”
A nu : “Na nu le na pai hmin teh zo an si? Ziang hna an tuan?”
Thangte : “Ka pa cu Pu Thuan Khar le ka nu cu Pi Hlawn Kai an si. An hnatuan cu….
(Thangte cu a mithmai a hung sen) ka pa cu sa contact a la theuih ka nu cu bazarah hanghnah hangrah pawl a zuar theu….”
A nu : “Aw! Cet…cet…cet… zangfahza an si ual! Paisa tla na harsa zet pei cu? Thla
khatah ziangzat hrawng an lo kuat thei?”
Thangte : “Tampi tla in kuat thei dah lo. Daihaw fangfang hi si ko.”
A nu : “Tenren zetih na hman a tul pei cu? Lakphak vek hman na in thei dah ka zum lo.
Hmm…..a awl lo nasa ding…”

Cutin mileng panga pawl cu pakhat hnu pakhat cipciar zetin a thu duhduh a sut vivo. Milengpawl cu umngaihnak hman an thei nawn lo. An ning a zakin mualphothlak an ti tuk lawmmam. Cinte nui’ mi nautat a thiamdan le milian farah a thleidanzia pawl khal rei lote sungah an theithiam cih. Curuangah rei an to paih nawn loih, lungrual zetin an ding thluh. Cinte nu khalin, ‘To hrih hmen uh…Cinte hman a ra suak hrih lopi,” tiih tawngkam tha hmanih a ti lo ruangah an suak vurvo.
An gate an thlen zawngah Cinte cu a ra tlansuak ciamcoih gate leng ihsin an rak hngak. Cinte
cun,“Ziangah si mi hman hngak loih nan tin tum mai? Ka rei deuhih nan ngol mawsi?” tin a
ra ti. A rualpipawl cu pakhat le pakhat zohaw phahin,“Si lo e, ra len tum hrimhrimih ra tla kan si lo. Bazar lam kan vak phahih a remcan ruangah kan ra lut duak men hokhaw…rei kan to man lo hrimhrim. Ni dang le nuamten kan ra lo leng leh ding….sun tha mai!” tin an tiih an tinsan.

HTML Comment Box is loading comments...