Myanmar ah OIC(Organization of Islam Cooperation) pehtlaihawknak zungpawl onnak thu cu mipi duhnak thawn a kaihawk theilo ruangah sian a si lo ding ti'n President zung ihsin Oct 15 ni ah thusuahnak a nei.
          President zung internet cahmai ih thusuak ahcun Myanmar cozah cu leitlun rampawl thawn hnatuan tlangnak ah ram ih zahngaihnak, national siipuaahlawknak, kilhimawknak leh kiang le kap tisiaklonak pawl parah a thumaw ih hnatuan rerotu a si ti tla tarlang a si.
         OIC zung ra onnak ding thuhla thawn pehparaw in an kankuat tilangnak ah Myanmar sungih khawpi 20 hmuah ah phungki pawlin hmaihruai in sandah piahnak an nei.
         Magway, Pakuku myo ah phungki 2000 hrawng in Myosung lamzin zawh vivo in an tlawng pakhat ah OIC thuhla relkhawmnak an nei.
        Yangon ahcun phungki leh mipi zate 5000 ai tamin shwedagon ihsin Sule tiang sandah piahnak an rak nei. Sule an thlenhnu ah thusuak siarnak an neih lai ah cozah in OIC zung on a sianlo ding thu relnak a um.
         Mandalay myo, Rakhine ramthen, Sittwe, Myouk OO, Minn Pyar, Chauk, Yinanchaung, Yeesakyo, Phyarpung, Pyi, Taungngu leh Mawlamyaing pawl leh hmun dangdang khal ah sandah piahnak an rak nei ve cio.
         Zung khuai onsian a silo tithu ah Myanmar cozah lamih tlangzarhmi a um hrih lo thu leh himi thu a fiangzo a si ah cun minujng leh minung zangfahaw ih bawmnak hrang ah Myanmar cozah ih a uksak lonak an langtermi a si tin OIC ih Muslim mimalte pawlkawm ih hotu Director Mr. Talal Daous in BBC  hnenah a sim.

        

HTML Comment Box is loading comments...