China ramih an khawpi hmun tampi ah tulai ni mal reilo te sungih thinheng sosang zettu miburpi cun Japan business hnatuan pawl leh ambassador innpi, zung pawl an do bet rero lai ko.
        Beijing ih Japan ambassador zung hmaiah zinzawhtu pawl cu aukio in Japan thilri pawl an duhlonak an langter.
        Meisa ih urkangnak,thilri laksaknak pawl ruangah industry(cetzung) hnatuantu pawl hrang kilhimawknak a um lo ruangah Japan company pi pawl a simi Panasoni leh Connan company pawlin an thilri tuah bet loin an cawl hrih.
        Japan pawlin China east-north hmunpi cu kum 1930 laiah an rak laksak nak nipi cu thaisun a si ih himi niah lungawi loih zinzawhtu an tamphah men thei.
        China media cun zinzawhtu pawlcu ralring leh ruathiam zetih tuahdingin thucahnak a nei. China cozah cun tidai thenawknak thu elawknak cu Japan cozah lamin ralring zetih tuahtha dingin thu a cah ve.
        Tuvekih Japan pawl donak ruangah China ramih Japan investment an neihmi hrang thinphannak a suak thlang. Thuthlirtu pawl cun Japan hin China hi lanin Thai leh ramdang sawnah thilri tuahsuak dingin an thawnaw thei ko tin ruahnak an rak neihsak.
        Tuah cun buainak a suahnak hi islands pawlah China ngakai lawngpi pawl cun hma an nawr rero. Himi island pawl hi Japan in a rak kilkhawi lai. China ngakai lawngpi pawl Japan tipikap kiltu pawlin an rak kham a si ahcun buainak a suak thei ih thinphan um za a si.
        Hiti buainak ra suak vivo mi hi Japan mi pakhat ih neihmi East China Sea ih an buainak island pawl cu Japan cozah in leiding ti a ti hnuih boruak ra her danglam aw mi a si.
        An buaipi mi island cu China in amai ta si a ti ve bangin Taiwan lam ihsi khalin a neitu an si ve thu an relmi a si. China lamin Diaoyu tin an ko ih Japan lamin Senkaku ti an kawhmi island ah minung an um lo nan mineral resource(leihnuai thilri) tampi a um. Ramhnih karlak buainak tete ihsin kum 2010 a hung si cun an buainak cu a sang deuhdeuh ih tuini tiang an buainak asi.

HTML Comment Box is loading comments...