X20 thingyian mamdat bomb puahtu tiih puhnak thawn thih tiang pek ih thawngthlak mi politician thawngtla Ko Phyo Wei Aung cu cozah in tuini sunhnu deuh ah khan an suahsal.
       Amah hi cancer natnak tuarin a taksa hnuailam cang thei nawn lo ruangah Insein sizungpi ah tuamhlawm laimi siin thukamnak ah sign in an suahsal a si ti Ko Phyo Wei Aung in RFA hnenah a sim thei.
        "Nehhnuah maw, hivek thilsual tuahleh a si ah cun a hlan ih hremnak khal ka tuaral ding, cuvial. Kei mah cu thin cancer ka tuar rero. Sii vai tla ka ei ringring. Thin ihsin cancer cell pawl hi ruhpi bik tiang an thleng theh zo ruangah zangruh pi 8 leh 9, ahleice in pa 8 nak hi maw, a ei theh zo. Ka zangruh bik a ei theh zo ruangah ka thluak lam a dai ih tucu ka hnuai lam cangvaih a ngah nawn lo." tin fa pahnih nei zo pabik cu tuvek in thawng inn ihsin a ra suak zo nan hi a natnak ruangah Insein siizungpi ah tuamhlawmnak kan nei rero lai ko tin an nu Ma Htee Htee in a sim.
       Ko Phyo Wei Aung hin amai case thawn pehparaw in mipi pawl thei ding in simrelnak a nei lah ding vekin a mai tawnmi thawnginn thu leh an thuthendaan pawl khal ca ih suah leh a tum thu khal a sim tel.
       Hivekih a ra suahsal thu hi Hongkong ih um Asia Human Rights Commission AHRC khal in an lungawi pi thu faknak pakhat an suah ih amah tuamhlawmsalnak khal neih a tha tin a ngan bet.
       UN Human Rigths ih ahleice aiawhtu Mr Thomas cu a liamcia mi monday ni ah Ko Phyo Wei Aung a va tawnnak ah taksa hnuailam cangthei nanw lo mi anih cu ke kharh thawn a va hmu ih himi thuhla hi hotu pawl hnenah rel ding tin  sim ta.

HTML Comment Box is loading comments...