Aug 3, Nitin Van Mana
Saam 63-65, Rom 6


Saam 63:1
Maw Pathian, nang cu ka Pathian na si ih nangmah ka lo ngai. Ka nunnak pumpi in nangmah a lo ngai a si. Leiro, leicaar le tidai um lonak leilung in tidai a haal vekin ka nunnak in nangmah a lo haal asi.


"Ngalcaar khawn maw zuunngaihtuar a naa deuh?" ti'n kan rak sutaw ttheu.
Kan duhdawtmi mi pakhatkhat kan ngai tikah tuar a har thei zet. Lung a zunih tuar a har fualfo rori si ko.
Leitlun ih kan duhdawtmi kan ngai tlukin kan thlarau in Pathian a ngai tuk, a hlam ringring.


Kan tisa cun tisamipawl lawng a theiih tisamipawl lawng a ngai. Kan thlarau cun tisamipawl hnakin Sersiamtu Pathian a ngai.
Tisa ih ttulmi cun kum 70-80 a daih ih, thlarau ih ngaimi cun kumkhua a daih.


"Kan damsung hrangih kan duhdawtmi kan ngai kuahko thiam ahcun kumkhua hrangah kan nunin Pathian cu a ngai thluahthlo ding hi asi."




Rom 6:23
Ziangah tile sualnak ih hlawhman cu thihnak a si; sikhalsehla Pathian ih laksawng cu kan Bawipa Khrih Jesuh thawn kan pehzom awknak thawngin kumkhua nunnak a si.


Mizan ah innsang thuzirhnak ka neihmipawl minung pa-10 lai hnenah thu ka sut.
"Milai cu ziangtik khalih thi thei kan siih tu rori ah thi bangta awla vanram na kai kem?" ka tiih, an pa-10 sungin pa-1 lawngin "Kai ding" ati.
Anzate'n Khrihtian innsang ih suak, tthanglian, Pathian thu a thei dohdotu an si ko. Asinan an nunnak ah kumkhaw nunnak hrang fianawknak an neilo ziar. Kan miphun lakah hivek hi kan tam zet ding ti cu riahsiatza zetin ka zum.


Rundamnak kan ngah hi kan tthatnak ruangah asilo, a zumtu hmuahhmuah hrangah pekmi asi. "A zumtu hmuahhmuah!" (Johan 3:16)
Khrih cu rundamtu asi ti kan zumnak thawngin miluat kan siih amah thawn pehzomawknak kan nei. Khrih thawi' kan pehzomawknak thawngin kumkhaw nunnak kan ngah ding.


Mi piangthar kan si hnu ih nitin kan sualnak hin kan thin in ti nuamlo ih kan thih le heelram kan tla phumpho ding ti'n kan ruat. Satan ih bumnak asi. Zumtu cu Khrih thawi' pehzomawknak nun a nei ding; Bible casiarnak le thlacamnak thawngin. Cumi cu a hrangah thazang asi ding; sual ningzahnak hmuahhmuah a neh vivo theinak dingah.


Zumtupawl cu, ...
1) Zumnak in rundam kan si.
2) Rundamfa cu Khrih thawi' pehzomaw ding kan si (Bible casiar le thlacamnak in)
3) Nitin nunah sualnak neh vivo ih Khrih ih tthatnak langter vivo ding kan si. (Khrih ih tetti)
4) Zumtu dangpawl thazang pektu le zumlotupawl hnenih Thuthangttha karhzaitertu ding kan si.






Pathian thlawsuahnak ..... na hnen um hram seh!!!

HTML Comment Box is loading comments...