July 10, Nitin Van Mana
Job 41-42, Dungthluntu 16:22-40


Job 42:5-6
Culai ahcun ka hnaa lawngin ka lo thei; Atu-ah cun ka mit rori in ka lo hmu zo. Curuangah ningzak in ka fih aw ih, leivut le vutcam lakah to in ka siiraw a si.

Job tlukih Pathian ttihzahtu le a thuthluntu in "Pathian cu ka hnaa lawngin ka rak thei" ati.
Harsatnak phunzakip a ton hnu lawngah "Pathian cu ka mit rori in ka hmu zo" ati.
Cule Pathian hmaikaa ih a tlinlozia a hmufiangaw ih lungsiir in a um.

Hna lawngih Pathian a theitu pawl cun an tlinnak le an tthatnak lawnglawng an hmu aw.
Mit rori in Pathian a hmufiangtu cun an tlinlonak an hmufiang sinsin ih Pathian hnenah lungkuai sualsiir in pan.

Pathian a theih lawng siloin a hmufiangtu pawl cun;
-Anmah le anmah an hmufiangaw sinsin, an tlinlonak an thei.
-Sualsiir in Pathian hnen an pan, Pathian hmaikaa ah sualnak phuang in ngaidam an dil.
-Pathian in a ngaidam, Jesuh Khrih thisen cun an sualnak hmuah a tlengfai.
(1Johan 1:5-10)


Dung 16:31-34
Annih in, “Bawi Jesuh zum awla nangmah le nan sungte in rundamnak nan ngah ding,” tiah an ti. Cule Pathian thu cu amah le a innsaang zate hnenah an sim. Cuih zan rori-ah cun thawnginn uktu pa in a fehpi hai ih an hmaa pawl cu a buah sak; cule cuvete in amah le a innsaang zatein baptisma an lak. Cun Paul le Silas cu a inn ah a hruai ih rawl ei ding a pek. Amah le a innsaang zatein Pathian an zum ngah ruangah lungawinak in an khat.

Khrih ruangah an tuar. Annih cun an tuarnak pawl an zoh lo. Pathian an thangtthat, thla an cam. Pathian kutcak an nunah a lang.
-Anmah vuaktu kha anmah tuamhlawmtu ah a cang.
-Anmah thawnginn ih khumtu kha anmah a inn ih a cohlangtu ah a cang.
-An thuken a huatu kha an thusimmi a ngai ih a zumtu ah a cang.
-Anmah a hreemtu kha anmah rawldotu ah a cang.
-Anmah ruangih thinhengtu kha anmah ruangah lungawinak in a khat.

Khrih ruangah ziangvek khal tuar ttih hlah!
Miih relsiatnak, thuphan puhnak, hremnak, thihnak... zianghman ttih hlah aw. Na tuarnak ruangah lehrul hlah. Khrih ruangih na tuar hi Pathian thangtthat awla thlacam sawn aw. Na nehnak sawn asi!

"Khrih ruangih tuarnak cu na tuar tam poh le na lungawinak a tum sinsin ding."


Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...