No lai caan hi minung nunsung caan ih thupi bik caan hnih nak a si, a pakhatnak ah semmawng nauhak lai a si. Nauhak lai ah thiltha tuah ding leh ding lo hi thliar thiam a har nasa cu mi hrang ah cun kilkhawi tu a thupi sawn lala. A kilkhawitu ih zirin nauhak nun a her danglam aw thei. No lai caan ti mi hi tleirawl ih sin tarhlan (kum 15 ihsin kum 40 tiang) hrawng ding a bang. Thalai kan ti khallen a sual lo ding, a thu cu a bang aw ko. No lai caan ih thupi mi ziang ha a si pei ti seh la a sannak a tam tuk,rel cawk lo tiang a um thei. Cumi lak in ziang mi hi si kan hrang ih tuah ding ih tha ti mi mal lai in ngan ve ka duh.
           No lai caan ah duh duh tuah ih nun men hin kan hmailam nun tampi a siatsuah in a ti dang lam thei nasa. Kan tuah ding mi hi kan theih feng a thu pi em, a tha na ti mi tuah aw la si nan na hrang ih tha mi sawn kha hril thiam sawn aw la na hrang hlawknak tam pi a suak thei. Kan duh mi kan tuah ah kan thin di a riam ko nan cu mi hin siatnak in thlen thei lala fawn. Nauhak kan si nawn lo ruang ah kan duh mi kan tuah thei ko nan kan tuah mi hmuahmuah kan hmatawn ngam sal a tul. A tha hmang kan ti mi tla rak tha lo deuh tla a si thei ih, a siat nak a ra suah hnu ih sirawk leh hin thansonak in pe tam lem lo ding. Cu ai in kan tuah hlan ah fimkhur ten tuah seh la a tha sawn ding.
          Kan no lai caan hi kan damsung ih kan cah lai bik caan a si. Ziang vek hna khal kan tuan thei ih kan tha khal in a tlin lai fang a si. Thalai  cun hna pakhat tal a tuan a tul rori. Cu mi khalah hril tuk lo in mai tuan thei zawng leh mah thawi mil aw hna kan tuan thei a va tha ve. Hna hril tuk hin hna neih lo nak in thlen thei. Kan hmai lam ruat in, tui kan dinhmun ai ih thanso kan duh,kan tum a si ah cun hna a tam maw a mal maw kan tuan teng teng a tul. Mai kut rori, mai thiamnak rori,mah cahnak rori kan hman a tul. Ziang mi ha kei ka thiam ve ti hi kan theihfiang awk khal a tul nasa. Kan kut lam kal zawng kan theih a tul kan ti pei cu ti.
            Zirsang ka si ve ual loh ti ding cu zohman kan um lo. Kan tuan,kan tuah thei ve mi hi a bangrep aw thluh. A mah lawngte, kan tuan mi a bang aw lo men ding. Kha mi kha a thupi bik mi a si lo. Ziang kan tuah khal ah tuan men lo ih a ai ih tha ih kan tuah,kan tuan a si ah cun nehnak kan co ve thotho ding lole kan duh mi hmun kan thleng ve thotho ding. Zirsang mi cun zung(office) ah maw, company tivek ah maw hna a tuan tla a si men ding nan zuamnak a neih cuang lo cun a si nak kai lo in a kel ringring ding, thansonak a um cuang lo. Kan tuah tuan mi ah kan thinlung tak in kan tuah,tuan ah cun zo zo khal a tha sawn mi kan ngah teng teng ding.
           Beidawng lo ih hnatuan hi hlawknak leh thansonak bik a si. Thin har caan khal ah ka hna tuan mi cu ka hna a si ti thei tla a tul theu. Midang in kan tuah,tuan duh mi in kham, in hnaihnok tla si men ding, cu lai khal ah kan mah hi kan thu pi bik. Kan tuah mi a tha, a thianghlim a si ah kan tuah thotho a tha bik. Cu mi, kha mi tuah, tuan sawnaw an ti mi kan thlun sawn a si ah cun a rei hlan ah kan ning thei, kan paih nawn lo bembem thei. Kan thu kan thlun ngam tla a tul.
           Capoh men ih tuan nak in hlawk a um thei lo. Ti ngai ngai in kan tuan a si ah cun kan hrang tha bik mi, kan tum mi kan ngah thei ding. Ti luklak men in kan tuan a si ah cun zianghman kan cang suak thei dah lo ding. Mi kut hnuai ih hna kan tuan a si khal ah, in hruaitu ih ti ruang ih tuan men kan si ah cun mi tla niam kan si lai.  Cu ai in kan theih cia mi hna a si ah cun fial hlan ah tuan fekfo tu si thei seh la a tha zet ding. Theih hrih lo mi a si ah cun an fial mi tha te'i tuan, ziang tin himi an tuah ti theih tum khal a thu pi zet.
             Ziang vek hna khal zir a theih theh. Zir ding mi a tam zet nan na paihzawng, na phur zawng kha hril thiam aw. Hi mi zir duh tho, khi mi sawn khal zir duh thotho tivek kha a tha lem lo. Khawkhan cia neih thei hi mi thangso nun pakhat a si. Kan mai khawkhan daan vek ciah in cun thil a cang theh lo men thei nan, a ra thlen tik ih khawkhan cawp ai in thil ti a fuh theu sawn. Kan duh vek ciah ih a ra caan lo hman a tha sawn mi lamzin kan ngah awl sawn ding.
            Ziang ha kan tum mi ngai ngai ti kan theih fiang a thu pi tuk lawmam. Tum mi kan neih lo cun ziang tik hman ah mi pitling kan si lo ding ih kan thangso dah lo ding. Mi hmuh ah mitha, mi fel tla kan si men thei nan kan mai nun thangso dah lo ding. Mingaisang tu ai in mi ngaisan mi si hi kan tum sawn kei uh. Kan tum ruh daan ih zir in kan tuah, tuan mi ah hlawhtlinnak kan ngah rang in, kan ngah har thei. Mi tumruh hlawhtling lo an um lo ti seh la a sual tam lo ding. Electric tuah suak tu khal kha a vei hnih khak tuah men ah a ngah lo ti kan zaten kan thei ko. A ve sawm, zaa tiang  a tuah sal rero hnu lawng ah a duhmi meisa eng thei a ngah lai. Cu lawng hman si lo, tu ah cun cu mi a rak tuah mi hi leitlun ah minung hrang ih thupi bik, tangkai bik pakhat ah a cang. A tumruh zia hi a mak tuk lawmam. Vei tam kan tum mi kan ngah lo tla a si thei men, kan bei dawng lo kei uh, ve khat kan tlaksiat len a veihnih nak ah a zin tha sawn kan ngah thei.
          

Lungawi
Salai:H.Lun

HTML Comment Box is loading comments...