June 30, Nitin Van Mana
Job 17-19, Dungthluntu 10:1-23

Job 19:25-27
Asinain keimah i ṭantu cu a nung ti ka thei; A netnak ah leilung parah a ding leh ding. Natnak in ka vun cu ei ṭheh     hmansehla, Hitiih ka tisa thawn Pathian cu ka hmu ding. Ka mit rori in amah ka hmu ding,  Midang si loin keimah rori in ka hmu ding a si. Cumi cu ka thinlung in a hngakhlap.   

Job in a ruahsannak a thei. Cui' a ruahsannak cu a nungih cumi cun amah a nunterih ziangvek harsatnak a tonmi khal tuar theinak le tluselo teih dinhnget theinak thazang a pek.

"Kan ruahsannak hi a thupi tuk!"
Leitlun thilah kan ruahsannak kan bum asile leitlun thil ruangah awlte'n kan tlu mai ding.
Vanlam thilah kan ruahsannak a um asile vanlam thil cun kan nun in cakter sin ding.


Dung 10:2, 4
10:2- Amah cu Pathian a ṭihzah zettu a si; a innsungsang in Pathian a bia ringringtu an si. Judah mi mifarah pawl tampi a bawmih catloin Pathian hnenah thla a cam ringringtu a si.
10:4- Vancungmi cun, “Pathian cu na thlacammi le mifarah na bomnak parah hin a lung a awi ih na dilnak a thei a si..." tiah ati.

Mani ah Dorkas, tuini ah Kornelias, Pathian biaknak diktakte'n a biaktu kan hmu thei.
Judah pawl hi Pathian biaktu miphun, a thianghlim mi miphun ih a ruataw hlehle mi an si. Anmah lo hi cu Pathian hmailkaa ah mi ten-um ah an ruat. Judah pawl mithmuh ih miphun thianghlimlo lakah a telmi Rom ralbawipa khalin Pathian nung cu a rak biakih Pathian in a biaknak le a thlacamnak a sang asi.

Kornelias in ziangti'n Pathian a biak tile;
1) Pathian a ttihzah ih a innsungsang in Pathian an biak ringring.
-Pathian ttihzahteih kan nunih kan innsang khal Pathian thute thawi' kan kaihhruai a thupi tuk.
2) Judah (culai ah Rom kuthnuai ih um, hmuhsuam nautat tuar rerotu miphun) mifarah tampi a bawmih Pathian hnenah catloin thla a cam ringring.
-Mi in ziangih an siarlomi mi farah le nauta kan va bomnak le Pathian hnenih catbang loin kan thlacamnak hi a thupi tuk.
3) A thlacamnak le mifarah a bomnak parah Pathian a lungawi ih a dilnak a theih sak.
-Pathian kan parah a lungawilo ih kan dilmi khal in theihpi lonak hi "Mifarah ziang kan siarlo ih bom hna kan thiam lo ruangah le thlacam nun kan neih lo tuk ruangah asi thei. Ahh... asi thei ti lawng siloin asi rori ko!

"Unau, na siarmi hi thuthangca bangih theihttha men le siar nuamah ka rak nganmi asilo ti in theih sak hram aw. Na nunnak ah siamthar le remawk a ttulmi na hmuhsuak asile Pathian hnenah thlacam aw, a takih na nunpi theinak dingah!"



Pathian thlawsuahnak ..... na hnen um hram seh!!!
Salai Vanruah.

HTML Comment Box is loading comments...