Zing tin ten a tuan thei bik in ka tho ih  ka tlan theu. A nuam ka ti thei nasa. Zing dai ih tlan hi a rak manhla in hrisel nak khal ah a rak tha zet fawn. Zing dai thawh pek ih dai tiamtiam Falam khawsung, hmun tin ah cumci mero thawn, par tin a mawi bik Laitlang pangpar tintian pawl hi zovek zuk suai tu khal in hi tluk ih mawi mi thil hi cu an zuk dah lo ding. An rak zuk theu zo a si hman ah mai mit rori ih ka hmuh zo ruangah hitluk ih mawi in cun ka hmu thei nawn lo ding ti ka thei fiang zet. Hmu lo tu cun mang  maw ka man ti ding khawp in boruak um daan leh nikhaw mawi daan hi a mak in a dang lam, ka hmuh mi hmun hmuahhmuah dang hnak in.

            Zing khat cu hla deuh tiang ka tlan ih zinsir bus stop pakhat hnuai ah kutdawh bang zet mi pakhat pa a rak it ka hmu.Sam ti biambiam hnok luihli, puan setak tlek hnianghniang zo hi a sin ih, zing khawidai thei in a ke a cawm nasa. Aih, hitluk khawpi  mawi leh cangkang sungah kutdawh tla an rak um lai maw si ti ruat phah in mangbang nawn in mal lai ka vun zohfiang bet. A hnok zia leh a tawp zia hi ai,ai,ai va se lawmam ve. Ai, a hung cang fuamfo ih a hmai fai lem lo ka vun hmu bet. Ka zang lamlam a fak ciamco, ka dawn a ti har thla theh lam. A mit bi  te thawn cun I hun zoh ii ka tuk lamlam a paw tum, ka lainat tuk ruangah si ding. A hmel zaten ka hmu theh. Ka thin lung ten kan Laimi a si pang pei maw? Kan Laimi a si ah cun hivek rori ih um thei teh. Hitluk Falam thang so zo ih hivek rak um ve cu a va pawi ve. Sungkhat unau dang teh a nei lo maw si? Maw, thluak lam that lo nak a nei maw si? Tivek pawl ka ruat buai nasa lawk. Ti siamsi ten ka hei hnih san ih in rak hnih san ve.

            Biak ka tum ih ka kaa ka aan zawngah nupi nu pakhat kan lam pan turto ih ra ka mit thlam in ka hei hmu. Ka be ngah sal lo. Kan lam ah a ra tum a bang ual. A ra thleng ngaingai. Ka rak zoh ring ring. “Pa Thang, Pa Thang tho aw,tho aw, kan tlung ding. Kan lo hawl rero hokhaw. Khah tho aw” ti phah in a lu a vun tun sak ih a vun kai tho.Laimi a si ngaingai ual, mangbang za a va si ve. A nih khallen a tho ve mai ih a puan la in a thlun mai. Nupi nu cun in zoh kir sal lo. Kar nga hrawng an kar hnu ah vei khat in I run zoh kir sal, a hni siamsi phah. Aih,ka thin a tham nasa cui tum in hnih san mi cu. Ka kut pharh in bye-bye ka piah ih ka hnih san ve. Cutin in feh liam san.

              Ka thin lung ah a cam ringring cumi ti siamsi tei in hnih san mi kha. Ziang hman ka thei fiang lo nan ka sim fiang thei lo mi thil pakhat ka thinlung ah a cam ti cu ka thei fiang aw zet. Sinan, ziang vek ciah ti cu rel ngaih nak ka thei ve lo. Tih tiseh la si lo deuh, thinphang tiseh la si ngaingai deuh fawn lo.Zah um tak mi si vek in tla ka thinlungah a rung um. Thinlung ah hna a tuan kan ti men pei cu ti a awl zawngin. Ka thlir ringring ih an lang baan tiang. Cui sin kei khal ka tlan thawk lala sal.

              A cuisun khal meeting ka kai lala, sinan tu cu hmun dang ah a si ve thung. Hotel dang ah a si ih ballroom khat in meeting kai tu kan um. A tamsawn cu keimah vek Laimi kan si ih midang pawl cu Mirang(ramdang ih si ra),Kawl tla mallai, cun India lam mi tla an um hnuaihni. Tu ih meeting kan neih mi hi hmun dang dang ih kan company ih tuantu sang pawl tawnawk khawm nak a veikhat nak meeting a si. Meeting ra kai tu kan tam in kan nuam tlang nasa. Himi company hi ram 40 lai ah dinsuah a si zo ih, company(outlet) hi 160 tiang awn bet vivo a si zo. Awnak puai tla kan hman theh hnu in thutawi relnak ka nei ve. Ka vung ding hi ka tuk vek a paw ciamco in ka thei. Kan Laimi hitluk tam hmai ah veikhat hman thu rel in ka ding dah lo ih ka thin phu vek a rang ciamco tum. Cu len ka thin ah lungkim tuk nak a rung thleng leh, cucu kan miphun in hitluk hmai kan sawn zo ti mi ka ngah sal. Kan company a rak thok daan ihsi thawk in tui kan company dinhmun leh, hmailam kan project neih mi tawitheibik, famkim tak ih ka rel hnu ah lungawi thu simnak thawn ka thu rel ka cem ter ih ka to nak hmun ah ka to sal.

             Thaw a suak hlunhlo duh nasa. Cun, tawk fang in tuikum sungih company ih suklut tambik laksawng  peknak an nei ih cumi ah Salai leh Mai company(outlet), Falam in a ngah ta riai. Himi hmun leh himi company khuai ih tuan ka si lo nan ka lungawi tuk lawmam. Ka duhdawtmi Lai ram ih um kan company khuai in a ngah si hman seh la kei mai ngah vek in ka lung a awi tuk. Ka za beng a rak ring luan deuh si ding ka kiang to ve pawl in in zoh duh nasa. Pawi ka ti lem lo ih ka zam cuang fawn lo. Laksawng phunphun pek awk nak kan theh in sun thai thawh ei khawm nak kan nei a cui Hotel pi ah cun. A sun cu cutin sunvu in caan ka hmang liam. A va nuam te te ee.

            Tak ka khawlh aw  ih cu theh in zanriah ei  ih leng suak ding ah thlalang hmai ah ka bih aw. Duk, ti ro rin ka thinlung ah tuizing ih zinkap ih it ka hmuh mi pa ih hmel a lang dukdi. Ka lau tum lam ual. Thla lang hmai ding in ka sam nuam te hriat phah le cumi pai thu ruat phah in ka timlam aw rero. Ka ruat phah phah ka ti ko nan a ziang mi bik khi ruah ding ka thei cuca cuang fawn lo, ka thin lung ah a um ring ring lai fawn. A mah tawn leh sal ih thusuh vek maw ka cak ka thei thiam aw lo kei mah le mah khal.  

            Zan riah ei ding in ka pawk suak ih rawldawr pakhat ih ka luh zawng ah tui zing ih Pa Thang, Pa Thang ti ra ko tu nupi nu(Nu Cuai) kha ka vun hmu duk di cuteh. Aih lala dah, a nih khal in in rak hmu ve ih hmudah mi bang ih thei fiang ngai ngai deuh lo bang khin in rak zoh ve. Hni phah in ka baan ka hei phar ih a nih khal in in rak hnihsan siamsi ve. In vun mang leh sal si ding. A tonak cabuai ih to ve ding in in rak sawm.Zanriah ei ding in an pa(Pa Kai) a rak hngak ve lai hi a rak si. Ka lungawi daan, thil ka theih duh mi mal te tal theih ngah beisei zet thawn a tonak cabuai lam pan in ka va feh. Cuisin cibai aw phah in hmin pawl, khui tawk in ti pawl kan sut aw ih tawkfang in a hngah mi an pa a ra thleng ve.

           Rawl kan cah, in ding a ti pawl kan cah ih tawkfang minute 20 hrawng ah cun ei leh in kan thawk thlang. Ka thinlung ih ka rak pai ringring pawl hi vun suh dukdi ka cak zet nan ka hmaisawng hai fawn, theih len ka hiar tuk lawmam fawn. Rawl ei phah khal in kan ti ti rero phah ko. Ka um thei nawn lo, a can can cang ko seh tin kei mah thotho cun hmaisawng deuh nawn ten thusuh ka thawk lala. Pa Kai cun awl sam zetzet leh hnuai ih ret deuh in Pa Thang thuhla ka suh mi pawl cu in sang men. Tawkfang nawn tiang Pa Kai in Pa Thang cu ee mi bang lo si maw ti a si, mi ih ziang khal ih siar lo tak si maw ti a si, na thil a rak lo dil sapbai maw si? Tivek ih a ti tam deuh thlang in Nu Cuai um thei nawn lo in,

          “Si lo, si ko, si lo hokhaw. A hlan ah cun kan nih hnak ih fim, thluaktha ngaingai, mi taima zet, ziang vek hna khal tuan hruthro, mi law, ca thiam tak sokhaw a si nan tu ah cun na hmuh vek kha a si ko” tin tah aw deuh nawn in in a run tong suak tla hi cuh AIH, ti rorin ka thin I khei dukdi. Ka zum vek ciah cu si lo nan, ka hmuh pek ih ka thin I thawng tu hi himi a rak si deuh men thei ka ti aw sal rero. A ziang mi bik ti ka theih lo mi kha tu ah theifiang zet vek in ka um thlang. A ruah ngaihnak ka theih lo mi khal kha tu ah cun ruahding tampi nei ah i cang ter. Mi tam pi in mi aa vek ih an rak zoh ih an rak nautat hmuhsuam rero mi khan thuanthu mak tuk a nei ti an rak thei hai lo si ding hi maw ka ti rero. Ziang ruang bik ah hi tin a cang ti len….

             Pa Thang hi Pa Kai tei unau sarih lakih upa bik a si ih cathiam sang a rak si. An ni san lai ih cathiam sang hi cu rak thiam tak an si. Pa Thang hi Surbung International Airport tuah ding hrang tan la emem tu, a thiamnak, a thacah nak pawl nasa tak hmang ih rak bei tu a si. Zuam nasat te in a rak zuam, kan Laimi thansonak ding ti hi a sunmang tumbik leh a zuam nak san pi bik cu a si. Kum a rei deuh in a sunmang cu a ngai ah a ra cang ta. Vanzam ra tum hmai sa bik hi Kawlram sungta Asia Myii timi private vanzam a si ih, cunah cun cumi company boss pawl an tel. An zoh ih an duh tuk Pa Thang hi an ngaisang tuk hivek ramdang thiam nak tel lo ih mai ramsung mi in hi tluk ropi mi vanzam tumhmun design a rak zuk thiam hi an uar tuk. Thla hnih khat a rei hnu in ramdang mi ra zohtu tam pi an um ih  cumi pawl khal in an uar in ropi an ti thei nasa. Pa Thang rori in interview si seh sunloihnak si seh tampi a dawng. Caan a rei deuh in cozah hotu pawl in an ngaihlo a si hmang ding. Cu tin nan tuah, kan thu in do, kha tin nan ti lo tipawl a phun phun hek nak thawn airport laksak an tum. Sumpai lam bawm tu hi ramdang in a si ruangah a cucu ziang hman ti ngam lo in hotu tampi parah an lungawi lo thu an sim. Cu mi Pa Thang in a theih ve ten cozah hotu tawng in ngaithiam a dil, ting sak lo ding in. Buainak tam pi tla a lak ah asuak phah ko. Cuisin, Pa Thang riang ri parah an lungawi lo lala ih na design hi cumi ih ta na copy(laksawng) tivek, kan thu lo in na tuah tivek a phun phun in a siat nak an hawl thlang. Pa Thang cu tangdawr lo ngam tak in a do vivo thotho. Ni khat cu palik in an kai ta, cuisin  Falam thawng inn ah an thlak lawk ih ni li,nga lai a rei hnu ah Naypyitaw lam ah phurh ih cozah daan ih thurel catsak ding an ti. Pa Thang cu a hlo ringring ta lawk. Kum hnih hnu ah mi dang in Pa  Thang, Falam a hung thleng sal zo tin mi in Nu Cuai tei an sim ih cutin an inn ah an ko sal. Ziangtik ah a thleng ti khal zohman in an thei lo ih, ziang tin a thleng ti khal zohman simthei tu an um lo. Cu mi ih sin tutiang mi bang lo in a um lan ta cih. Ziang ruangah hitin a cang? Zo ruangah? Ziangtin an tuah? Tithei tu khal zohman an um hrih lo. Thawng a tlak lai ah cun Falam khal pursum leilawn nak lam ah hma tampi a rak sawn ih tu vek tiang in kan mit hmuh lai rori ah kan ram a thanso zia kan hmu thei. Pa Thang ih that nak zar khal tam pi a tel sokhaw tin Nu Cuai cun Pa Thang ih thuhla tawifamkim zet in in ruah bet.

            Aw, tu cu ka thei fiang ngah riai! Ka ruahban ve lo mi thil tam pi a rak cang si hi Falam khawpi sung ah hin. Kan thei baan lo deuh teh a si pei maw? Cu vek thu hla rel ka thei dah ngelcel lo. Mi taima tak Pa Thang kan rak neih ruangah Surbung tlang ih airport hin ramdang ih an airport tluk in a mawi ih a pi, curuangah ram dang mi an ra lut cupco ih sipuarzii tuah in, cu mi ih si kan Falam thang so vivo a rak si ti hi tu lawng ah fiang ten ka thei ta. A va mak ve aw, mi raltha lukhum pektlak rori a rak si. A mah cun a thei nawn lo ding nan a mai ruangah kan miphun in hlawk nak tampi kan ei ih kan thang so theh zo. A zuamnak pawl hi kan hrang mei eng in hmuh tu a rak si. Ka di a riam tuk, curuangah si pei maw a mah ka hmuh lai ih ka thin lung a dang lam ciamco? A hnih ka hmuh ih dawnhar zet ih ka um? Aw minung hi lenglam men zoh in ziang mi a thiam, ziang mi a rak tuah, ziang vek a thei, ziangmi a ruat? ti theih thei ding a rak si ual loh.

             A cuizan cu zan var thu ruat in itthat thei lohli lo in ka um. Ka theih duh mi ka thei theh nan ka thin lungah hmun I khuar sinsin. A mah thawi titi thunuam rel ka cak sinsin, a mah tawnih cibai ka cak ciamco. A thuhla pawl suhsal ka hiar sinsin. Zan simpi tiang cumi thuhla ruat in ka ihkhun ah ka zau rero. Ihthat tum rero hman seh la a ngah lo rori si ko. Ka ruahnak hmuahhmuah, ka thluak zate ah hithu lawng in a khat theh. Zan cu a sim vivo, a  sim vivo.

lungawi..

Pehlaiding……

Salai:H.Lun