A mak in a mak lawlaw ti lo cu rel ding ka thei lo. Surbung International Airport ih ka to mi vanzam a tum zuaizo lai hi rak hmu ve uh la ka va ti ve aw. A pi in a mawi tuk fawn, a cangkang fawn si, himi ruangah si Kawlram sung ih vanzam tumhmun cangkangbik pahnihnak a rak ngah. Mak ka ti ihng a mak ka ti sinsin. Falam ka veikhat tlawn nak a si ih ka tha a tho in ka phur tuk lawmam. Ka zum ai hnak hman in a rak turu tuk lawlaw. Vanzam ih sin ka tum zawng ah lenglam ka vun zoh cuh...
            
              Eng hemhem Falam khawsung a langban nak hmuah in meisa rawng phunphun thawn, ka mang maw si a si ti ah ka mit ka vun nuai, ka mang a rak si ta riai lo. Ka hna ih ka theih mi leh tu ih ka hmuh mi hin in ti aa theh zik in ka thei. Hna theih menah cun Falam a thang so tuk zo ti cu a si ko nan, hivek lawmam si thei ding in ka rak ruat dah lo, ka ruat baan lo sawn si. Inn a sang thei tawp ih sahmi inn pi, building pipi delh aw teptep pawl khin a cangkan nak an lang ter cuang in ka thei. Ka mang cu si lo lawlaw. Hotel mawi emem, pi emem khal hmun tin ah an lang demdem, mawi tak hokhaw an si. An sak daan design len khawlvel ah hivek ih mawi thei thil a rak um maw si ti ding khawp in a pi in a mawi.

             Cutin, taxi la in Salai Five Star Hotel ah ka feh. Taxi to phah khal in ka cuan rero ko, ka lungphu vek a tur ciamco ih ka lung vek a  awi ciamco. Ka hna a ngam in nuam ka ti fawn, ka thinlung ten ka rak uangaw zet. Kan feh vivo ih zin tlun kan feh thul zin hnuaitu in kan feh thul, cumi lai ih ka vun man mi cu American ih an zinpi a tlun leh hnuai ti khepkhep kalh aw rere vek ka vun mang. Cuvek ah cun si ko kan feh rero ih, American kan tul nawn ual loh ka ti phah ka thinlung ten. Tawkfang kan feh in ka thlentum nak Hotel kawt ah taxi cun in thum. Ka vung lut ih sangka kiltu in sangka in rak awn zawngah "Lungawi sopar ten kan lo hmuak" tin tongthiam leh thiam lo in kala hmel puu deuh pa in hnisiamsi ten in rak hmuak, kawl kala a si pei maw thei hlah, Laimi cu a si lo lawlaw.

Pehlai ding....

By:Salai H.Lun

HTML Comment Box is loading comments...