Cinte cu a rualpi (an inn ra leng hmaisabiktu) pawl cu riahse zetin an liam tiang a thlir ringring. A mitthli a rung hal ttuamtto. A rualpipawl mithmai a siat tuk danah a nuin ziangtin simaw a rak ti a si ding ti cu a ruat thei mai. A ning a hang hluahhlo. Cutin ngui zetin inn sungah a vung lut.
Inn sung a thlen veten a nuih thinheng mithmai cu a va tawng dukdi. A nu cun a tai parah a kut suang phahin, “Cinte, na rualpipawl cu ziangvek minung an si thlang? An nu le an pa le sathat na, fangfai zuar na, lothlo na, puantthi na… mingai khal pakhat hman an um lo.
A sar khal na sar thiam! Ziangtik hmanah khavek kan inn rung lutter nawn awhlah. Mah le dinhmun thawi mil mi tla hawl hmen. Khabangpawlin zianghman an lo bawm thei dah lo ding… tuihnu cing ringring aw…,” tin a rak kawk ciamco. Cinte cu a ning a na tuk. Asinan zianghman a sawn ngam fawn lo.
A thinlungte cun,
“Ka nu, kanmah teh ziang kan si ce cuang? Ziang si uanawk ding kan neih mi? Ka pa
zung hnatuan a sinak hi maw? Ka pai’ tlunah mi paziat an um hrih ti na thei ve si lo maw?” ti mi thusuhnakpawl thawn………

*******************

“Ka pa, kan tlawng kainak a hla tuk. Thirleng thawi feh cu a bangthlak tuk….ka paih nawn lo.
Asawngah in ret uh…,” tin a nui’ theih lawn Cinte cun a pa a dil. A pa khalin a ruah a ruah tikah dikih a theih ruangah Cinte ih tlawng kainak thawi a nainak hmunah asawng a sansak.

Asawngih Cinte a tthawn le veten ar-kho-khuh awn tak a bang! Innih um a zinfe zatin asawngih um cu a thaw a suak vuarvi. Zo dawntu le khamtu, kawktu le phuntu khal um lonak hmun a si vekin, a um pekah tla cun umngaihnak hman a thei lo. Zalennak ropi a co ngah zo, tin a ruat!
Asinan, cui zalennak a kut sungih ra thleng mi cu ziangvekin a hmang ding ti cu a thei lo.
Ziangahtile, zalennak hi a rak co dah mi a si lo vekin, ziangvekih hman ding a si, ti zohmanin an rak zirh dah lo. Zalennak sungih mahte ukawkdan siseh, dik zet si ih nuam zetih hmandan a um ti khal zohmanin an rak sim dah lo lawlaw.

Cinte asawngih a umnak thla ruk a kim cuahco cun tlawngta lakah a thawmvang theih ding a um phahphah thlang.
“Cinte cu Kawl tlangval pawl thawn ttha-yi (tthan-yi) an intlang ih a ri thla lawlaw.”
“Cinte cu zan nahzi 12 hnu lamah si a ra tin theu. Asawnghmuin last warning a pe zo.”
“Cinte vahpi ding tla a ngamum nawn lo. Kawl tlangvalpawlin ziang siar lo tukin a
fehnak kipah an rak auh khum ciamco theuih a mualphothlak tuk.”
“Cinteih tlangval phamdan lawmmam hi… zarh khat hrangah pakhat a thleng tawn vivo.”

“Cinte cu nau a thlaih a tawl theh zo, a taksa khal a reh thluh.”

Theih cawk lo thuthang cu a ra suak leuhleuh theu. Asinan a nu le a pa cun zianghman an thei lo.
Zohman khalin an sim ngam lo.

Cinte cu tlawng khal thaten a kai dah lo. Amah le amah tlawngta a si lam khal a theiaw lo a
bang. A duhduhin le nuam a ti dandanin a nung ko. Cutin camibuai an tuahih rizalh a ra suah tikah cun Cinte cu sapzek (subject) pathum lai a sung tariai!

Tlawng pih sung an innih a umdan a zoh tikah Cinte nu cu a mang a bang thlang! A fanu cu
tuihlan vek si nawn loin, a nungcang le a hawiher khal a danglam thluh zo ti kha ttihnungzain a theifiang thlang. Ziangahtile, an inn leng lam ihsin tlangval hawklak phunphunin tu le tu an ra hnaihnok; Cinte an ra hlam, inn hmai ihsin an run auh…..hrekkhat tla cu zuri sabah men bangin ri biaibiaiih ra leng tumtu khal bo lo. Cu lawng hman a si hrih lo, amah Cinte rori hman hi a cancanah zu a nam theu vek tlain a theih can a um theu. Asinan, cuvek a ti ding cu a zum thei si lo.

Thil umdan a zohih thatei a ruah tikah Cinte nu cun thil umdan diktak cu a hmu suakin a
theifiang rumro mai. A fanuih nundanih zirin tlangvalpawl khalin an respond ve tinak a si! A
fanu, a tette lai ihsin kha tluk a rak hrekkhawng, nun a simin a ngaihsak cingin, asawng a um vetei thil rung danglam thluh lohli mai hi cu ziangruangah a si tiih a ruah tikah ‘a rualpipawl ruangah’ a si tin a ruat suak.

Cinteih rualpipawl a sangsangih a hun ruah tikah, Cinteih a pawl tambik mi cu Kaite a si tin a
ruatih, culeveten, Kaite tei inn lamah a va feh.

******************

Kaite tei inn a va thlen cun Kaite cun inn ra leng dingin a sawm nan Cinte nu cu lut duh loin inn lengah a ding. Cule ring zet le cawl lawn a hun auh:
“Kaite, nangmah ruangah ka fanu hmuah a ler thluh! Huahsuah le thil tha lo zirhtu khal
nangmah na si! Ziangtik hmanah Cinte rak kawm nawn awhlah! Nanmah a lo pawl ruangah si ka fanu hmuah a zuvat thluh! Nangmah ruangah………..nangmah ruangah ……ruangah……”

****************

Pangpar hi a ci a si laiah siseh, a thangih a kung dinhmunih a um lai khalah siseh, a hung
kuhmum can khalah siseh, ziangvekin a par a mawi in a hmui ding ti theih cia theih a si dah lo.
Cun pangpar mawi zetih hung par suak thei ding cun, phun pekte ihsin ngaihsak a tul lawng
hman si loin, dik zet le a si ding dan cekciih tuamhlawm thiam khal a tul hrih.

Pangpar pakhat, a mawi zat ding teih a hung par suah theinak ding le a hmui zat ding vektei a hmui theinak ding cun a tuamhlawmtui parah a thumaw, ti a theih ding.

Cinte hi pangpar thawi tahtthim theih a si, tiih ruah a theih ding a si ahcun……..

******************************

HTML Comment Box is loading comments...