Nang ka lo hmuh hlanah
DUhdawtnak ih mawizia ka rak ruat thiam lo
Nang ka lo tawn hlanah
Duhdawtnak ih thlumzia ka tep dah lo
Nang ka lo duh hlanah
Duhdawtnak ih umzia ka rak thei dah lo
Nang ka lo ngai hlanah
Duhdawtnak in hmual a neihzia ka rak tuar dah lo;

Nang ka nunnak sungih na lut hnuah
Duhdawtnak ih thlumzia i tep ter
A mawizia khal i hmuh ter
A umzia i theih ter ih
Hmual a neihzia in tuar ter
Duhdawt daan nang in in thiam ter

Ka kai ding thei lo tlai ni liam ding
Ka lo kham thei lo nangih in then ding
In fehsan hnuah
Duhdawtnak cu thenawknak ah an cang leh sal
A thlumzia khal a khaa mi tur bang an cang leh sal
A mawizia cu tihnungza ah an cang lehsal
Duhdawtnak ih umzia cu
Liamhnu na zuun tuarnak ah cang in
Hmual a neihzia cu
A har tuarnak men ah an cang leh sal

Ka thinlung cu puakkuai theh in
I tap ter sun leh zaan in
Nangngainak in ka caan i hmang ter
Ka ruat leh sal caan liam hnu kha
Nang rak lo tawng lo ningla hi bang ka tuar ding maw?
Ka sunmang hman mawi thei nawn lawn
Ka zanmang tiang tisia ter tu
Ka nunnak hmuah ti buai thluh tu
Ka ruahsannak na cim ter theh

Ka beiseinak ti khaw lo tu
Ka lo hua ding maw?
Duhdawtnak ih umzia i zirh ruangah
Na parah ka lungawi sawn ding? ti in
Lungvai ih ka ruat theu
Aww duhdawtnak
Theihthiam, ruahthiam,pomthiam daan
A va har theu em!!!!

                      By: Ma Tluang( Hausum Fanu)